Ընթացիկ տարվա մարտին ԱՀ Նախագահի նախաձեռնությամբ ստեղծվել է «ԱՀ պետական, համայնքային, իրավաբանական և ֆիզիկական անձանց պատկանող գույքին պատերազմի հետևանքով հասցված վնասների հաշվառման և գնահատման հանրապետական հանձնաժողով», որի նպատակն է ի մի բերել պատերազմական գործողությունների հետևանքով հանրապետության տնտեսությանը հասցված ընդհանուր վնասների չափը:
Ինչ եղանակներ են նախատեսվում կորցրած գույքի փոխհատուցման վերաբերյալ
ՍՏԵՓԱՆԱԿԵՐՏ, 1 մայիսի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում հանձնաժողովի ղեկավար , ԱՀ կադաստրի և պետական գույքի կառավարման կոմիտեի նախագահ Կարեն Շահրամանյանը նշել է, որ աշխատանքային խմբում ընդգրկված են մասնագետներ Հայաստանից և Արցախից։
«Փորձում ենք կենտրոնացնել բոլոր ուժերը և ծավալուն այս աշխատանքներն իրականացնել պատշաճ ձևով: Գերատեսչությունների ներկայացուցիչները, ովքեր ընդգրկված են հանձնաժողովի կազմում, յուրաքանչյուրն իր մասով պետք է հաշվառի հանրապետությունում գույքին հասցված վնասները և ներկայացնի կազմին, որից հետո կիրականացվեն գնահատման աշխատանքներ: Մեծ գործառույթ ունեն կատարելու ԱՀ տարածքային կառավարման և ենթակառուցվածքների նախարարության աշխատակիցները, համայնքների ղեկավարները, ինչպես նաև «Արցախէներգո», «Արցախգազ», «Արցախկապ» ՓԲ ընկերությունները: Այս կառույցներին արդեն իսկ ներկայացրել ենք պահանջները , և յուրաքանչյուրն իր մասով արդեն իսկ փաստացի տեղեկացնում է վնասների չափերի մասին» ,- մանրամասնել է Կ. Շահրամանյանը:
Նա տեղեկացրել է նաև, որ կորուստների մեջ կա նաև չհաշվառված գույք . այս ուղղությամբ լուրջ աշխատանքներ են տարվում, որպեսզի դրանք ևս հաշվառվեն։
Խոսելով վերահսկողության մասին՝ հանձնաժողովի նախագահն ասել է, որ իրենց կազմը, ընդհանուր առմամբ վնասների չափն է գնահատելու, իսկ երկրորդ հանձնաժողովը, որը ստեղծվել է ԱՀ նախագահի հրամանագրով, իրականացնելու է հասցված վնասների դիմաց աջակցության տրամադրումը ՝ համաձայն ԱՀ կառավարության որոշմամբ հաստատված ուղղությունների։
«Ուզում եմ մեր բնակչությանը տեղեկացնել, որ հասցված վնասի դիմաց մենք չենք իրականացնում փոխհատուցում, քանի որ սա աջակցության ծրագիր է: Ծրագրում ընդգրկված են մարդատար մեքենաներին, բեռնատար, գյուղատնտեսական, շինարարական և հատուկ նշանակության մեխանիզմներին, անշարժ գույքին ՝ ոչ բնակելի, որի մեջ մտնում են արտադրամասեր( ֆերմաներ, ռեստորաններ և հասարակական նշանակության այլ շինություններ), նյութական ակտիվներին կաթնատու և մսատու կենդանիներ, մեղվափեթակներ, պտղատու այգի և խաղողայգիներ) հասցված վնասները: Բացի հանձնաժողովից, մենք արդեն ստեղծել ենք աշխատանքային խումբ, որը զբաղվում է փաստահավաք գործերով: Ընտրել ենք աշխատանքային խմբի տեղակայման վայրը, այժմ զբաղվում ենք տարածքի կահավորման, ինչպես նաև համացանցի, հեռախոսակապի տեղադրման հարցերով: Առաջիկա տասը օրերի ընթացքում համապատասխան մասնագետների ընդգրկմամբ տարբեր լրատվամիջոցներով հանրությանը տեղեկացնելու ենք մեր տեղակայման վայրի և կոնտակտների մասին, որպեսզի ներկայացնեն իրենց դիմումները: Բացի այս կարգից, Կադաստրի պետական կոմիտեն պետք է ներկայացնի աջակցության միջոցառումների կարգը, որն արդեն մշակված է, որտեղ նշվում է անհրաժեշտ փաստաթղթերի, ինչպես նաև , թե որ դեպքում դրամական ինչ աջակցություն է տրամադրվելու և այլն։ Գործելու են նաև սահմանափակումներ։ Այստեղ շատ կարևոր է քաղաքացիների ազնիվ վերաբերմունքը, որովհետև արդեն իսկ ստանում ենք տարբեր խնդիրներով դիմումներ»,- եզրափակել է Կ. Շահրամանյանը:
