ՍՏԵՓԱՆԱԿԵՐՏ, 4 հունիսի, ԱՐՑԱԽՊՐԵՍ: «Արցախպրես»֊ի հաղորդմամբ՝ Խրամորթ և Նախիջևանիկ համայնքներին հարող հողատարածքների զգալի մասը չի ոռոգվում, քանի որ այդ տարածքները սնուցող ջրանցքները պատերազմի ընթացքում մնացել են թշնամու վերահսկողության տակ: Հարցը կլուծվի Կարկառի հոսքն օգտագործելու դեպքում միայն:Աշխատանքներն արդեն ընթացքի մեջ են:

Իվանյանի հատվածում ջուրընդունիչ է կառուցվում: Այստեղից Կարկառի ջուրը խողովակներով կհասցվի Նախիջևանիկի բարձունք:

«1200տրամաչափի խողովակով 5150մ տեղափոխելով` բեռնաթափման ավազան է հասնելու, որը նաև պոմպակայանի դեր է կատարելու: Պոմպակայանի միջոցով 320լ/վ արագությամբ կհասցվի նշված բարձունքը` ինքնահոս կերպով ոռոգելով Նախիջևանիկի, Վարդաձորի, ինչպես նաև Ասկերանի հողերի մի մասը: ՄԻջանկյալ ջրամբարից կոռոգվի Ասկերանի, Խրամորթի և Խանապատի հողերը»,- մեզ հետ զրույցում նշել է «Ջրային տնտեսություն» ՓԲԸ տնօրեն Գեորգի Հայրիյանը:

Միջանկյալ բեռնաթափման ավազանից խողովակներով ոռոգման համար ջուր կստանան նաև Խրամորթի և Խանապատի հողօգտագործողները: « Եթե այս հարցը լուծվի , համոզված եմ, որ մեր այգիների տարածքները անհամեմատ կավելանան:Այս պահին 500հա հողային պոտենցիալ կա, և երիտասարդները պատրաստ են ,ոռոգում ունենալու դեպքում, հիմնել այգիներ, ջերմոցային տնտեսություններ»,-նշել է Խանապատի համայնքի ղեկավար Սամվել Շահրամանյանը:

Կարկառից վերցված ջուրը հողատարածքներ է հասնելու ինչպես պոմպերի միջոցով, այնպես էլ ինքնահոս: Մինչև ընթացիկ տարվա վերջ նախատեսվում է նոր ցանց կառուցել, և Կարկառի ձախափնյա բոլոր հողերը կընդգրկվեն ծրագրում:

«Բավական մեծ ծրագիր է. կարելի է ասել, որ Ասկերանի շրջանի այս հատվածի հողերի ոռոգման հետ կապված խնդիրներ չենք ունենա: Ոռոգովի կդառնա Ասկերանի շրջանի ավելի քան 2000հա հողատարածք` փոխելով այս տարածքներում գյուղմթերքների արտադրության տեսակարար կշիռը:Ծրագրի արժեքը կկազմի մոտ 3մլրդ դրամ: Շինաշխատանքները ջրային տնտեսությունն է համակարգում.առայժմ ներգրավված են յոթ շինարարական կազմակերպություններ:ԱՀ Նախագահի հանձնարարականով` աշխատուժը կավելացնենք, ջրատարը ժամանակին շահագործման հանձնելու համար»,-ասել է Գ.Հայրիյանը: