Արցախյան 44-օրյա պատերազմի ընթացքում «Արմենպրես»-ի հետ համագործակցությամբ իրազեկման գործում մեծ ներդրում ունենալու համար Արցախի Հանրապետության նախագահի հրամանագրով իտալացի հասարակական գործիչ Մասիմիլիանո Ֆլորիանին պարգևատրվել է «Երախտագիտություն» մեդալով:
Պատերազմի օրերին «Արմենպրես»-ի լրահոսը իտալախոս լսարանին հասանելի դարձրած գործիչը պարգևատրվել է Արցախի նախագահի կողմից
ՍՏԵՓԱՆԱԿԵՐՏ, հուլիսի 14, ԱՐՑԱԽՊՐԵՍ։ Պատերազմի օրերին իտալացի գործչի ջանքերով «Արմենպրես»-ի լրահոսից հսկայական ծավալի տեղեկություն հայտնվեց իտալական մամուլի էջերում:
Պարգևի հանձնման հանդիսավոր արարողությունը տեղի ունեցավ «Արմենպրես» պետական լրատվական գործակալությունում՝ տնօրեն Արամ Անանյանի գլխավորությամբ: Արժևորելով արցախյան 44 օրյա պատերազմի ընթացքում Մասիմիլիանո Ֆլորիանիի կատարած աշխատանքը՝ Արամ Անանյանը նշեց, որ դա արվել է մասնագիտական բարձր որակներով:
«Պատերազմը ոչ միայն ռազմի, այլև տեղեկատվական դաշտում էր: Պատերազմի ժամանակ գործընկերներիցս մեկը հարց հնչեցրեց այն մասին, թե ինչու չունենք իտալերեն լրահոս: Կապվեցինք Մասիմիլիանոյի հետ, ով այդ բեռը ստանձնեց ու «Արմենպրես»-ի թիմի հետ մի շատ կարևոր գործ արվեց: Հսկայական ծավալի տեղեկություն հայտնվեց իտալական մամուլի էջերում: Մասիմիլիանոյի ջանքերի շնորհիվ մի շարք իտալական համայնքներում Արցախի անկախության ճանաչումը հասավ կարևոր հանգրվանի: Պատերազմից հետո մենք սգում ենք մեր կորուստները, բայց արժանավորներին պետք է պարգևը գտնի: Այդ արժանավորներից մեկը մեր բարեկամն է՝ մարդ, ով 44 օր մեր կողքին էր, մեզ հետ հավասար, անմնացորդ նվիրումով կատարեց ծանր աշխատանք: Դա արեց լրագրողի լավագույն որակներով, թարգմանչի բացառիկ ունակություններով, հանրային գործչի յուրահատուկ նվիրումով ու կարողություններով»,-ասաց Արամ Անանյանը:
Շնորհակալություն հայտնելով Արցախի նախագահին նման բարձր պարգևի համար՝ Մասիմիլիանո Ֆլորիանը նշեց, որ շատ ուրախ է նման գնահատանքի համար:
«Ես մեծ ուրախությամբ եմ աջակցել պատերազմի ընթացքում: Արդեն գրեթե հինգ տարի է բնակվում եմ Հայաստանում և ես ինձ հայ եմ զգում: Եթե իմ օգնության անհրաժեշտությունը լինի թե Արցախի ճանաչման, թե այլ հարցերում, ապա ես պատրաստ եմ շարունակել իմ ջանքերը»,-նշեց իտալացի գործիչը:
Մասիմիլիանո Ֆլորիանին տարիներ առաջ Իտալիայից տեղափոխվել է Հայաստան: Ամուսնացել է երևանաբնակ Մարիամ Զաքարյանի հետ, ու երկուսով տեղափոխվել են Գյումրի: Նա կարևոր դեր է ունեցել Իտալիայի մի շարք քաղաքների կողմից Արցախի անկախության ճանաչման գործում։ Արցախյան 44 օրյա պատերազմի ընթացքում նա մեծ ներդրում ունեցավ իտալական մամուլում իրազեկման ակտիվ աշխատանքներ կատարելու գործում: «Արմենպրես» լրատվական գործակալության հետ համագործակցությամբ պատերազմի օրերին կարևորագույն տեղեկությունները թարգմանվում էին իտալերեն
