Այսօր՝ հուլիսի 16-ին, Պոլ Էլյուարի Տուն Ֆրանկոֆոնիայի կենտրոնում կայացավ Sunrise Stepanakert մուլտիմեդիա արվեստի փառատոնը ամփոփող «Ապրելու ցանկություն» ֆիլմի ցուցադրությունը:
Արցախում կան երազանքներ, սեր ու ճակատագրեր. «Ապրելու ցանկություն» ֆիլմի ցուցադրությունը՝ Sunrise Stepanakert֊ի ամփոփում
ՍՏԵՓԱՆԱԿԵՐՏ, հուլիսի 16, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ Արցախցի երիտասարդ կինոռեժիսոր Մարիամ Ավետիսյանը նախաձեռնել է նկարահանել «Ապրելու ցանկություն» խորագրով վավերագրական սերիաներ՝ Արցախում հետպատերազմյան կյանքը ցույց տալու համար:
«Այս կարճամետրաժ վավերագրական ֆիլմերը ցույց են տալիս պատերազմի հետևանքներն Արցախում բնակվող մարդկանց վրա: Այս պրոյեկտը սկսել ենք պատերազմից հետո, որպեսզի ամբողջ աշխարհին ցույց տանք, որ Արցախը զուտ տարածք չէ, այստեղ կան շատ երազանքներ, սեր և ճակատագրեր», - ասաց Մարիամ Ավետիսյանը:
Փառատոնի համահիմնադիր Շուշան Քեշիշյանի խոսքով՝ հատուկ են ընտրել այս ֆիլմը՝ որպես փառատոնի վերջին միջոցառում:
«Ցանկացանք «Ապրելու ցանկություն» խորագրով ամփոփել փառատոնն այն հույսով, որ հաջորդ տարի նորից կունենանք արվեստի փառատոն Ստեփանակերտում: Մեր փառատոնի նպատակն էր շեշտել, որ մենք Արցախում ենք և շարունակելու ենք այստեղ ապրել: Շատ դրական արձագանք ստացանք, ուրախ ենք, որ փառատոնը ճիշտ ընկալվեց մարդկանց կողմից», - մեզ հետ զրույցում ընդգծեց Շուշան Քեշիշյանը:
Փառատոնի համահիմնադիր Լիլիթ Հակոբյանը նշեց, որ, նմանատիպ ֆորմատով միջոցառումները դարձնելով ամենամյա, շարունակելու են խթանել մշակութային կյանքը Արցախում:
«Մենք հավատում ենք, որ մշակույթը վերականգնման կարևորագույն գործիք է: Մեր նպատակն էր արվեստի խթանման միջոցով վերակենդանացնել Ստեփանակերտը վերջին կործանարար ամիսներից հետո: Ցանկանում էինք աջակցել և ոգեշնչել տեղացի մեր հայրենակիցներին, հատկապես՝ երիտասարդներին, որոնք, իսկապես, տաղանդավոր են», - շեշտեց Լիլիթ Հակոբյանը:
Կինոդիտումից հետո տեղի ունեցավ քննարկում և հարցուպատասխան ֆիլմի ռեժիսորի հետ:
