Արցախում միջազգային չափորոշիչներին համապատասխան նախնական մասնագիտական (արհեստագործական) կրթություն կազմակերպելու և Արցախի աշխատաշուկան բարձրակարգ արհեստագործ վարպետներով ապահովելու նպատակով «Անտոնիա Արսլան հայ-իտալական կրթահամալիր» հիմնադրամը հայտարարում է 2021-2022 ուս. տարվա ընդունելություն:
Հայ-իտալական կրթահամալիրը ընդունելություն է հայտարարել
ՍՏԵՓԱՆԱԿԵՐՏ, օգոստոսի 1, ԱՐՑԱԽՊՐԵՍ։ Այս մասին «Արցախպրես»-ին տեղեկացրել են ԱՀ ԿԳՄՍ նախարարությունից։ «Ընդունելության համար կարող են դիմել «Կարի արտադրության տեխնոլոգիա», «Հանրային սննդի մատուցում», «Խոհարարական գործ», «Փայտամշակման արտադրությունների սարքավորումների շահագործում և տեխնոլոգիա», «Ռադիոէլեկտրոնային միջոցների տեխնիկական սպասարկում և նորոգում», «Հրուշակեղենի տեխնոլոգիա», «Վարսավիրական արվեստ և զարդային դիմահարդարում», «Տրանսպորտային միջոցների շահագործում և նորոգում» (ըստ տեսակների) մասնագիտություններով »,- մեզ հետ զրույցում ասել է ԱՀ ԿԳՄՍ նախարարության մամուլի պատասխանատու Մերի Սարդարյանը, և հավելել, որ դիմել կարող են ինչպես հիմնական, այնպես էլ միջնակարգ կրթությամբ անձինք` առանց տարիքային սահմանափակման:
Մեր զրուցակցի տեղեկացմամբ` ուսուցումը հիմնական կրթության հիմքով կիրականացվի անվճար` 3 տարի տևողությամբ, իսկ միջնակարգ կրթության հիմքով՝ վճարովի՝ 1 տարի տևողությամբ: «Ուսանողները կստանան կրթաթոշակ, բնակարանի վարձի մասնակի փոխհատուցում և տարբեր աջակցման ծրագրերով կլինեն հիմնադիրների հոգածության ներքո, ինչպես նաև հնարավորություն կունենան աշխատանքի անցնել կրթահամալիրի նորաբաց արհեստանոցներում: Կրթահամալիրի շրջանավարտները կստանան պետական նմուշի դիպլոմ: Դիպլոմը ծառայելու է նաև որպես ավագ դպրոցի ատեստատ և հնարավորություն է ընձեռելու դիմել ցանկացած միջին մասնագիտական և բարձրագույն ուսումնական հաստատություն»,- ընդգծել է Մ. Սարդարյանը:
Ընդունելության համար անհրաժեշտ է ներկայացնել հետևյալ փաստաթղթերը` դիմում, որը կլրացվի տեղում, կրթության վկայական(բնօրինակ), անձը հաստատող փաստաթուղթ, 3×4 չափսի երկու լուսանկար: Փաստաթղթերն ընդունվում են հետևյալ հասցեով՝ ք. Ստեփանակերտ, Թումանյան 48` ԱՀ ԿԳՄՍ նախարարության երկրորդ հարկ: Հեռախոս` 047 941935: