Աֆղանստանի արմատական «Թալիբան» շարժումը համաներում է տարածել Աֆղանստանի կառավարության բոլոր պաշտոնյաների, այդ թվում` նախագահ Աշրաֆ Գանիի վրա` վստահեցնելով, որ նրանք կարող են վերադառնալ եւ ապրել Աֆղանստանում:
Թալիբները հայտարարել են, որ չեն թիրախավորելու Գանիին
ՍՏԵՓԱՆԱԿԵՐՏ, 23 օգոստոսի, ԱՐՑԱԽՊՐԵՍ։ Այս մասին Պակիստանի Geo TV հեռուստաալիքին տված հարցազրույցում հայտարարել է «Թալիբան» շարժման բարձրաստիճան առաջնորդ Խալիլ ուռ-Ռահման Հաքանին, փոխանցում է News.am-ը:
Հաքանիի խոսքով` թալիբների եւ տապալված նախագահ Աշրաֆ Գանիի, փոխնախագահ Ամրուլահ Սալեհի եւ ազգային անվտանգության հարցերով խորհրդական Համդուլլահ Մոհիբի միջեւ «թշնամանք» չկա: «Մեր կողմը ներում է բոլորին` գեներալից (որը պայքարում էր մեր դեմ) մինչեւ հասարակ մարդ», - երկուշաբթի օրը Հաքանիի խոսքերը մեջբերում է հեռուստաալիքը:
Նա նաեւ կոչ է արել երկրից փախած աֆղաններին չանել դա` հավելելով, որ այն քարոզչությունը, ըստ որի թալիբները վրեժխնդիր կլինեն իրենցից, «տարածում են թշնամիները»: Հաքանին խոստանում է, որ երկրում ապրող բոլոր ազգությունները կարող են իրենց հանգիստ զգալ: «Տաջիկները, բելուջները, հազարիներն ու փուշթունները` բոլորը մեր եղբայրներն են»,- վստահեցրել է նա:
Այնուամենայնիվ, ինչպես նշում են պակիստանյան լրատվամիջոցները, Աֆղանստանից հեռանալ ցանկացողների թիվը դեռ շատ մեծ է: Այդ թվում, ըստ Պակիստանի իշխանությունների, Աֆղանստանում է մնում Պակիստանի մոտ 800 քաղաքացի, ովքեր մտադիր են լքել այդ երկիրը:
«Թալիբան» շարժման գրոհայիններն օգոստոսի 15-ին առանց մարտական գործողությունների մտան Քաբուլ եւ մի քանի ժամվա ընթացքում լիակատար վերահսկողություն հաստատեցին քաղաքրի վրա: Աֆղանստանի նախագահ Աշրաֆ Գանին հայտարարեց, որ հեռանում է երկրից՝ արյունահեղությունը կանխելու համար: Շատ երկրներ տարհանում են իրենց քաղաքացիներին եւ դեսպանատան աշխատակիցներին: Տարբեր գնահատականներով` Աֆղանստանի տարբեր քաղաքներում մնում է մոտ 1000 հնդիկ:
