Աննա Գրիգորյանն Արցախ է եկել Մայր Հայաստանից և գրեթե 15 տարի է՝ այստեղ է ապրում ու արարում: Չրագործությունը նրա համար եղել է հոբբի, բայց ժամանակի ընթացքում դարձել է բիզնես ծրագիր։
Չրերի տուփերում արցախյան գույներն են, համն ու հոտը. հիմնադիր
ՍՏԵՓԱՆԱԿԵՐՏ, 29 սեպտեմբերի, ԱՐՑԱԽՊՐԵՍ: Ապրանքանիշի հիմնադիրը «Արցախպրես»-ի թղթակցի հետ զրույցում պատմեց, որ «ՅանՉիր» անվանման հիմքում ընկած է հայկական ազգանվան "յան" վերջածանցը, այսինքն ապրանքանիշը նա համարում է բոլորինը:
«Մեր այգու ծառերի բերքը չկարողանալով սպառել՝ որոշեցի չորացնել ու այդպես օգտագործել, այնուհետև նաև վաճառելու միտք առաջացավ, քանի որ դրանք բնական են, առանց շաքարի, առանց քիմիական հավելումների և կարող են մրցակցային լինել շուկայում: Մասնակցել էի Հայ բարեգործական ընդհանուր միության կողմից կազմակերպված ծրագրին, և իմ ներկայացրած բիզնես-պլանը դրամաշնորհ ստացավ: Այնուհետև արտադրությունը մեծ թափ է ստացել , քանի որ մինչ այդ ունեի փոքր չորանոց: Չորացնելուց հետո միրգը չի կորցնում իր համն ու հոտը, այլ ընդհակառակը՝ էլ ավելի օգտակար և համեղ է դառնում։ Վաճառվող տուփերում արցախյան գույներն են, համն ու հոտը», - նշեց Ա. Գրիգորյանը։
Մեր զրուցակցի համոզմամբ՝ արցախյան չրերը պետք է լինեն Արցախի այցեքարտերից մեկը։ «Այս տարի չորացրել եմ մոտ կես տոննա տարբեր տեսակի տեղական մրգեր: Շուկայում չրերը, իհարկե, պահանջված են, որովհետև մարդիկ հասկանում և գնահատում են բնական արտադրանքը: Իմ հաճախորդներն ի սկզբանե իմ ընկերներն էին, ովքեր ինձ օգնել են։ Նրանցից է սկսվել իմ արտադրանքի սպառումը:
Արցախյան չրերը հասել են Ռուսաստանի Դաշնություն, Նորվեգիա, իսկ շուտով նաև՝ Իսպանիա: Օնլայն հարթակում եմ պատվերներ ընդունում և իրականացնում չրերի տեսականու վաճառքը», - հավելեց Ա. Գրիգորյանը։