«ՏաԹևեր»-ը իրենից ներկայացնում է Արցախյան շունչ հաղորդող նվեր-գինիներ, որոնք պահանջված են, քանի որ տարբերվող են և կրեատիվ:
«ՏաԹևեր» գինիները փոխանցում են արցախյան բարբառի համը. արտադրող
ՍՏԵՓԱՆԱԿԵՐՏ, նոյեմբերի 10, ԱՐՑԱԽՊՐԵՍ։ «Արցախպրես»-ի թղթակցի հետ զրույցում Տաթևիկ Գրիգորյանը պատմեց, որ նվեր-գինիներ պատրաստելու միտքը եղբորն է պատկանում, իսկ ինքն այն իրագործեց։
«Քանի որ գինեգործությամբ ընտանիքս զբաղվում է շատ վաղուց և գինու մշակման եղանակն ու անվանումն ունի արցախյան ծագում ՝ «Ապուն Կինի», որոշեցինք արցախյան բարբառով պապական օրհնանքներով պիտակներ պատրաստել ու մեր գինիներն, այսպես ասած, հուշանվերների վերածել։ Անվան ընտրության շուրջ շատ չեմ մտածել. հիմք ընդունելով անունս՝ ստացա «ՏաԹևեր»֊ը։ Հուսով եմ՝ մեր յուրօրինակ գինիները իրենց գրվածքներով «թևեր» են տալիս ստացողին», - նշեց Տ. Գրիգորյանը ։ Մեր զրուցակցի խոսքով՝ նրան աջակցում են հետևորդ-գնորդները՝ իրենց սիրով և հավատարմությամբ, ինչը պարտավորեցնող է։ «Իհարկե, ուսումնասիրել եմ շուկան։ Նշեմ, որ Արցախում եղել եմ առաջինը, ով հանդես է եկել նման գաղափարով, և արդեն իսկ ունեմ իմ «ձեռագիրը» այդ գործում։ Մեր արցախյան գինու բաղադրության մեջ չկան քիմիկատներ և այլ հավելումներ», - ասաց Տ. Գրիգորյանը:
«ՏաԹևեր» գինիների վաճառքը իրականացվում է առցանց տարբերակով, ինչն այժմ բավականին արդիական է։
«Փորձ եմ ունեցել արտադրանքը ներկայացնելու նաև հայաստանյան շուկայում և հաջողել եմ, սակայն սպառողները հիմնականում Արցախից են», - հավելեց նա:
