«Սատարենք մեր հերոսներին» բարեգործական ՀԿ-ն և Ամերիկայի Հայ Ավետարանչական ընկերակցությունը (AMAA) ստորագրել են փոխըմբռնման հուշագիր, համաձայն որի՝ Ամերիկայի Հայ Ավետարանչական ընկերակցությունը կհովանավորի Ասկերանի շրջանի Նախիջևանիկ համայնքի նոր թաղամասի 16 տներից 6-ի շինարարական աշխատանքները։
Նախիջևանիկում նոր բնակելի թաղամաս է կառուցվում
ՍՏԵՓԱՆԱԿԵՐՏ, դեկտեմբերի 16, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասել է «Սատարենք մեր հերոսներին» բարեգործական կազմակերպության նախագահ Վիգեն Արաբյանը։
««Սատարենք մեր հերոսներին» ՀԿ-ն նախաձեռնել է Նախիջևանիկ գյուղի նոր թաղամասի կառուցման ծրագիրը 2021թ.-ի հունվարին: Արցախի կառավարության կողմից կազմակերպությանը նվիրաբերվել է 3 հեկտար հողատարածք: Կազմակերպությունն արդեն ամբողջացրել է հողային ուսումնասիրության բոլոր աշխատանքները և 16 սեփական բնակելի տների(նոր թաղամասի), ինչպես նաև՝ թաղային ենթակառուցվածքների և հանրային զբոսայգու համար մշակել է նախագծեր և նախահաշիվ: Նախիջևանիկում հողային աշխատանքներն արդեն իսկ սկսվել են: Այժմ կատարվում են հարթեցման և հիմքերի քանդման աշխատանքներ։ Սկսած 2022թ.-ի սկզբից` «Սատարենք մեր հերոսներին» բարեգործական ՀԿ-ն նախատեսում է կազմակերպել Նախիջևանիկի նոր թաղամասի շինարարության ծրագրին ուղղված բազմաթիվ դրամահավաքներ: Միևնույն ժամանակ, կազմակերպության դիմումի հիման վրա` ՀՀ կառավարության կողմից ծրագիրը ճանաչվել է բարեգործական»,- նշել է Վ. Արաբյանը։
Մեր զրուցակցի խոսքով՝ մասնակցությունն այս ծրագրին՝ Արցախը վերականգնելու և այն վերաբնակեցնելու առաքելության մի մասն է։ Պատերազմից անմիջապես հետո, АМАА-ն վերստին ձեռնամուխ է եղել ոչ միայն առաջին օգնություն տրամադրելու, այլև օգնելու վերակառուցել քանդվածը. մինչև օրս Արցախում նորոգել է 17 տուն` Ստեփանակերտ և Մարտունի քաղաքներում։
