1992 թ. հունվարի 26-ին ԱՀ Շուշիի շրջանի Քարինտակի հերոսական պաշտպանության շնորհիվ թշնամու ընտրազորը ջախջախվեց և հետ շպրտվեց:
Ադրբեջանա-արցախյան հակամարտություն. 30 տարի առաջ այս օրը` հունվարի 26-ին, ջախջախվեց թշնամու ընտրազորը
ՍՏԵՓԱՆԱԿԵՐՏ, 26 հունվարի, ԱՐՑԱԽՊՐԵՍ։ Այս կապակցությամբ «Արցախպրես»-ի թղթակցի հետ զրույցում «Կաճառ» գիտական կենտրոնի ղեկավար, պատմաբան Մհեր Հարությունյանը նշեց, որ բազմաքանակ թշնամու դեմ կենաց-մահու մարտն ընդունած Քարինտակը դարձավ Հայաստանի ռազմական պատմության նորագույն շրջանի մարտական փառքի գյուղերից մեկը:
«Բնակավայրի հերոսական պաշտպանությունն առայսօր հարուցում է ռազմարվեստի տեսաբանների ու դաշտային հրամանատարների կամ արհեստավարժ զինվորական մասնագետների զարմանքը: Կարծում ենք, որ ճակատամարտի արդյունքները դեռ երկար կհետաքրքրեն նրանց և կշարժեն այլևայլ հեղինակների վառ երևակայությունը: 1992 թ. հունվարի 26-ը բեկումնային եղավ ադրբեջանա-արցախյան պատերազմի ընթացքում. Քարինտակի հերոսամարտը վճռեց պայքարի ելքը` հող նախապատրաստելով առաջին հերթին Շուշիի ազատագրման, Արցախի Հանրապետության պաշտպանության բանակի կազմավորման և նրա հետագա հաղթական առաջխաղացման համար: Դժբախտաբար, 2020 թ. նոյեմբերի սկզբներին Քարինտակն անցավ ոսոխի տիրապետության տակ: Թշնամին գյուղ նորխուժեց: Իհարկե, պատմությունը դեռ կբացահայտի 2020 թ. նոյեմբերի առեղծվածները, իսկ հայ մարդը կրկին կվերադառնա հայրենի Քարինտակ, բայց մինչ այդ սերունդները դասեր պետք է քաղեն մեր հերոսական անցյալից», - եզրափակել է Մ. Հարությունյանը: