Այսօր՝ փետրվարի 10-ին, «Թումո Հայաստան» Թումոյի կրթական ծրագրի ընդլայնման նախաձեռնությանը միացած բարերարների շնորհիվ ԱՀ Մարտակերտ քաղաքում տեղադրվել է Թումո տուփ:
Մարտակերտում Թումո տուփ է տեղադրվել
ՍՏԵՓԱՆԱԿԵՐՏ 10 փետրվարի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում Թումո ստեղծարար տեխնոլոգիաների կենտրոնի հաղորդակցման, միջոցառումների և հանրության հետ կապերի բաժնի ղեկավար Զառա Բուդաղյանը ոգևորությամբ նշեց, որ այն Արցախի առաջին Թումո տուփն է:
«Թումո տուփերը տեխնիկապես հագեցած մինի-Թումոներ են, որոնք կարող են տեղադրվել ցանկացած փոքր բնակավայրում: Յուրաքանչյուր տուփում կա 16 աշխատատեղ, ինտերնետ կապ, գրանցման և մարզիչի աշխատանքի համար անհրաժեշտ գործիքներ և այլն: Մարտակերտում և մոտակա բնակավայրերում ապրող 12-18 տարեկան պատանիները Թումո տուփում անցնելու են Թումոյի կրթական ծրագրի ինքնուսուցման մասը, իսկ դասընթացներին ու աշխատարաններին մասնակցելու համար ուղևորվելու են Ստեփանակերտի Թումո կենտրոն` հատուկ տրանսպորտի միջոցով, որը մենք ապահովելու ենք: Մարզիչները անցել են համապատասխան թրեյնինգ և ամբողջությամբ տիրապետում են անհրաժեշտ հմտություններին», - ասել է Զ. Բուդաղյանը:
Թումո ծրագրի գլխավոր տնօրեն Մարի Լու Փափազյանի խոսքով՝ Մարտակերտի Թումո տուփը շաբաթական 320 աշակերտի կարող է 14 ոլորտներից գիտելիքներ մատուցել:
«Ընթացիկ տարում Ասկերան և Մարտունի քաղաքներում ևս կբացվեն Թումո տուփեր», - հավելել է Մարի Լու Փափազյանը:
ԱՀ ԿԳՄՍ նախարար Անահիտ Հակոբյանի համոզմամբ՝ Արցախը, մանավանդ հիմա, երբ բազում դժվար լուծվող խնդիրների առաջ է կանգնած, ունի նորարար տեխնոլոգիաներին տիրապետող, խելացի երիտասարդների անհրաժեշտություն:
«Արցախի երիտասարդը պետք է պատրաստ լինի ամեն ինչի, պետք է կարողանա ճիշտ կողմնորոշվել ցանկացած իրավիճակում», - նշել է Ա. Հակոբյանը:
Միջոցառմանը ներկա էին ԱՀ պետնախարար Արտակ Բեգլարյանը, պաշտոնատար այլ անձինք:
