Նախօրեին «Շուշի քաղաքի թանգարաններ» ՊՈԱԿ-ի Կերպարվեստի պետական թանգարանը, Երիտասարդների և սիրո բարեխոս Սուրբ Սարգսի տոնին ընդառաջ, Ստեփանակերտի Պոլ Էլյուարի տուն Ֆրանկոֆոնիայի կենտրոնում կազմակերպել է խորհրդանշական նվերների ու աղաբլիթի պատրաստման վարպետության դաս։
Երիտասարդների և Սուրբ Սարգսի տոնին ընդառաջ` Ստեփանակերտում խորհրդանշական նվերների պատրաստման վարպետության դաս է կազմակերպվել
ՍՏԵՓԱՆԱԿԵՐՏ, փետրվարի 11, ԱՐՑԱԽՊՐԵՍ: Միջոցառման սկզբում Տեր Ներսես քահանա Ասրյանը հնչեցրել է Տերունական աղոթք։
«Խորհրդային շրջանում եկեղեցին միայնակ էր փորձում ազգային քրիստոնեական մեր ավանդույթները վերականգնել։ Հիմա մեր հասարակության տարբեր շրջանակներ, եկեղեցու շուրջ համախմբվելով, մասնակից են դառնում հոգևորը, ազգայինը վերականգնելու գործընթացին։ Ըստ էության, կարող ենք ասել, որ այսօր եկեղեցին միայնակ չէ, ինչը ողջունելի է»,- «Արցախպրես»-ի թղթակցի հետ զրույցում ասել է Տեր Ներսես քահանա Ասրյանը։
«Շուշի քաղաքի թանգարաններ» ՊՈԱԿ-ի տնօրեն Լուսինե Գասպարյանը մեզ հետ զրույցում նշել է, որ միջոցառման նպատակը երիտասարդների շրջանում տարածելն է Սուրբ Սարգսի տոնի կարևորությունը։
«Մենք փորձում ենք երիտասարդների համար բացահայտել Սուրբ Սարգսի տոնի խորհուրդը։ Դասընթացը անց են կացրել Կերպարվեստի թանգարանի արվեստագետները։ Հրավիրել ենք համալսարանների ուսանողներին, մասնակցել են նաեւ բոլոր ցանկացողները»,-հավելել է Լ. Գասպարյանը։ Միջոցառմանը ներկա էր ԱՀ ԿԳՄՍ նախարար Անահիտ Հակոբյանը։