«Հայաստան» համահայկական հիմնադրամի ֆինանսավորմամբ Արցախում իրականացվող աշխատանքները հիմնականում մեծածավալ ծրագրեր են, որոնք, հետպատերազմյան իրողություններից ելնելով, ընդգրկում են ինչպես բնակարանաշինության ոլորտը, այնպես էլ ճանապարհաշինական տարբեր նախագծեր։
Պատասխանատուները հետևել են «Հայաստան» հիմնադրամի ֆինանսավորմամբ իրականացվող շինաշխատանքների ընթացքին (լուսանկարներ)
ՍՏԵՓԱՆԱԿԵՐՏ 14 փետրվարի, ԱՐՑԱԽՊՐԵՍ։Այս մասին «Արցախպրես»֊ի թղթակցի հետ զրույցում նշել է ԱՀ քաղաքաշինության նախարարության մամուլի պատասխանատու Մարթա Դանիելյանը։
«Նախորդ շաբաթվա ընթացքում ԱՀ քաղաքաշինության նախարար Արամ Սարգսյանը և «Հայաստան» համահայկական հիմնադրամի փոխտնօրեն Արարատ Խլղաթյանն այցելել են հանրապետության տարածքում մի շարք ակտիվ շինհարթակներ և տեղում ծանոթացել շինաշխատանքների ընթացքին։ Նրանք հետևել են Ասկերանի շրջանի Հովսեփավան և Իվանյան համայնքների երեք նոր թաղամասերի կառուցման աշխատանքներին։ Պատասխանատուները եղել են նաև մայրաքաղաքի Առաքելյան, Տիգրան Մեծ, Թումանյան 82 փողոցների շինհրապարակներում և Աջափնյակի ու Թումանյան փողոցի՝ նոր կառուցվող թաղամասերում»,֊ տեղեկացրել է մեր զրուցակիցը։
Ըստ Մ. Դանիելյանի՝ օրակարգում էր նաև ճանապարհաշինության ոլորտը։ Այց է կատարվել Մարտակերտի շրջան՝ Մարտակերտ-Ներքին Հոռաթաղ-Ճանկաթաղ նոր ավտոճանապարհի շինարարական տեղամաս, իսկ Ասկերանի շրջանում՝ մայրուղուց դեպի Աստղաշեն տանող բարեկարգվող ավտոճանապարհի հատված, որտեղ շինարարական ընկերությունների ներկայացուցիչների մասնակցությամբ տեղում քննարկվել են աշխատանքների ընթացքին առնչվող և ավարտման ժամկետներին վերաբերող հարցեր։
Լուսանկարները ԱՀ քաղաքաշինության նախարարության էջից
