Այսօր՝ փետրվարի 28-ին, Ստեփանակերտում հարգանքի տուրք են մատուցել Սումգայիթի ջարդերի անմեղ զոհերի հիշատակին:
Ստեփանակերտում հարգանքի տուրք են մատուցել Սումգայիթի անմեղ զոհերի հիշատակին
ՍՏԵՓԱՆԱԿԵՐՏ, փետրվարի 27, ԱՐՑԱԽՊՐԵՍ։ 1988 թվականի փետրվարի 27-29-ը Խորհրդային Ադրբեջանի Սումգայիթ քաղաքում ադրբեջանական իշխանությունների կողմից պետական մակարդակով կազմակերպվեց քաղաքի հայ ազգաբնակչության եղեռն և զանգվածային տեղահանություն:
«Արդեն 34 տարի է անցել Սումգայիթի ջարդերից:
Ադրբեջանի ցանկությունն այսօր Արցախի վերջնական զավթումն ու նրա ժողովրդին վերացնելն է:
Նրա հայատյացության գագաթնակետը եղավ 2020 թվականին Արցախի դեմ սանձազերծված պատերազմը:
Սակայն մենք պետք է շարունակենք տեր կանգնել այս երկրին»,-«Արցախպրես»-ի թղթակցի հետ զրույցում ասել է ԱՀ Ազգային ժողովի նախագահ Արթուր Թովմասյանը:
Արցախյան շարժման ակտիվիստ Սերգեյ Շահվերդյանի խոսքով՝ 1988 թվականի այս օրը ժողովուրդը հասկացավ, որ Արցախյան շարժումը առանց պատերազմի չի կարող հաջողության հասնել:
«Արցախյան շարժման հենց առաջին օրը մենք գիտակցում էինք, որ այդ շարժման բաղադրիչը պիտի լինի պատերազմը:
Այսօր մենք մեր հայրենակիցներին պետք է փոխանցենք սեփական երկրում ապրելու, արարելու անկոտրում կամքի գաղափարախոսությունը:
Ցեղասպան քաղաքականություն ամբողջ մոլորակում միշտ էլ եղել է, այսօր էլ դա շարունակվում է, ու ցավոք, տեղի է ունենալու ապագայում` քանի դեռ ցեղասպանության ոճրագործության յուրաքանչյուր դրսևորում չի պատժվել միջազգային հանրության կողմից»,-ընդգծել է Ս. Շահվերդյանը։
