ԱՀ Ասկերան քաղաքի Էդմոն Բարսեղյանի անվան միջնակարգ դպրոցի սաները միշտ բարձր են պահում դպրոցի անունն ու պատիվը:
Ասկերանի Էդմոն Բարսեղյանի անվան դպրոցի սաները բարձր են պահում կրթօջախի պատիվը. Տնօրեն
ՍՏԵՓԱՆԱԿԵՐՏ, 19 հուլիսի, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասել է դպրոցի տնօրեն Մարելլա Ավանեսյանը՝ ներկայացնելով ուսուցչական և աշակերտական կոլեկտիվների բարեխիղճ ու համակարգված աշխատանքի արդյունքում արձանագրված արդյունքները։
Նրա խոսքով՝ կրթօջախում կայուն գիտելիքներ ու հայեցի դաստիարակություն է ստանում 437 աշակերտ:
«44-օրյա պատերազմից հետո դպրոցն իր գիրկն է առել տեղահանված ընտանիքների 118 դպրոցահասակ երեխաների, ովքեր անմիջապես ներգրավվել են կրթական գործընթացին։ Նրանցից ակնաղբյուրցի Կարոլինա Համբարձումյանը վերջերս մասնակցել է Մոսկվայում կայացած Սանդա ուշուի միջազգային առաջնությանը և գրավել 1-ին պատվավոր հորիզոնականը: Աշակերտներից շատերը մասնակցում են առարկայական օլիմպիադաների և մրցանակային տեղեր զբաղեցնում: Մեր կրթօջախի սաներն իրենց ունեցած փայլուն գիտելիքների շնորհիվ առաջիկայում կմասնակցեն Հայաստանում կայանալիք համահայկական օլիմպիադային՝ «Աշխարհագրություն» և «Հայոց պատմութուն» առարկաներից»,-ներկայացրել է տնօրենը:
Մեր զրուցակիցը տեղեկացրեց, որ դպրոցի շենքը կառուցվել է 2009 թվականին՝ ԱՀ պետական բյուջեի միջոցներով, սակայն այսօր այն կապիտալ վերանորոգման կարիք ունի:
«Աշակերտների թվի աճով պայմանավորված՝ դպրոցի նյութատեխնիկական բազան թարմացնելու անհրաժեշտություն կա: Ունենք գույքի կարիք: Պետք է նշեմ, որ անցած տարի ՀՀ Կենտրոնական բանկի տնօրենի տեղակալ Ներսես Երիցյանի շնորհիվ դպրոցում համակարգչային նոր դասասենյակ է բացվել՝ տասը համակարգչով համալրված»,-ներկայացրել է Մ. Ավանեսյանը՝ ընդգծելով, որ, ձևավորված ավանդույթի համաձայն, կրթօջախում տոն և հիշատակի օրերն արժևորում են գեղեցիկ ու հագեցած միջոցառումներ կազմակերպելով:
Ցավով անդրադառնալով 44-օրյա պատերազմի ծանր հետևանքներին՝ տնօրենն առանձնացրեց դպրոցի չորս հերոս շրջանավարտներին, ովքեր անվարան իրենց կյանքն են դրել հայրենիքի զոհասեղանին։
