ԱՀ Մարտունու շրջանի Մաճկալաշեն համայնքի դպրոցում հայրենասիրական վեհ գաղափարներով կրթվում ու դաստիարակվում է 57 աշակերտ:
Մաճկալաշենի դպրոցում ապրիլին կմեկնարկի «Երկարօրյա դպրոց» ծրագիրը
ՍՏԵՓԱՆԱԿԵՐՏ, մարտի 8, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասել է դպրոցի տնօրեն Արինե Աբրահամյանը:
«Դպրոցի շենքը կառուցվել է 1967 թվականին: Այն կրում է Արցախյան ազատամարտի նվիրյալ, Մարտունու շրջանի գումարտակի հրամանատար Արմեն Մելքումյանի անունը: 2016 թվականին բարերարի կողմից շենքը վերանորոգվել է: Ճիշտ է, դասասենյակների պակաս ունենք, սակայն այդ հանգամանքը չի խանգարում, որպեսզի համակարգված և ըստ կարգի կազմակերպենք դասապրոցեսը»,-նշել է տնօրենը՝ հավելելով, որ դպրոցում իրենց գործին գիտակ 18 ուսուցիչ է դասավանդում:
Մեր զրուցակցի տեղեկացմամբ՝ «Թուֆենկյան» բարեգործական հիմնադրամի ֆինանսավորմամբ ապրիլին դպրոցին կից նոր մասնաշենք կկառուցվի, որպեսզի և´ դասասենյակների խնդիրը լուծվի, և´ «Երկարօրյա դպրոց» ծրագրի մեկնարկի հնարավորություն ստեղծվի, որին կմասնակցեն 1-9-րդ դասարանների աշակերտները:
«Կրթօջախում հաճախակի են կազմակերպվում տարբեր միջոցառումներ: Յուրաքանչյուր տոն օր այստեղ արժևորում ենք: Այսօր էլ Մարտի 8-ին նվիրված միջոցառում ենք կազմակերպել: Պատերազմներում անմահացած մեր համագյուղացիների հիշատակին նվիրված ցերեկույթներ ևս կազմակերպում ենք՝ արժևորելով նրանց սուրբ գործը: Պետք է նշեմ, որ շատ ամուր է դպրոց-բանակ կապը, ինչի շնորհիվ էլ աշակերտների մոտ ձևավորվում է հայրենասիրության բարձր գիտակցում։ Վերջերս սերտ համագործակցության համար Մարտունու 3-րդ պաշտպանականի կողմից դպրոցն արժանացել է պատվոգրի»,֊նշել է մեր զրուցակիցը։