Վերջին օրերին ԱՀ Մարտունու շրջանի Թաղավարդ համայնքի ուղղությամբ տարածքում տեղակայված ադրբեջանական դիրքերից բարձրախոսներով գյուղը լքելու սպառնալիքներ էին հնչում:
«Թաղավարդն աշխարհի ամենալավ բնակավայրն է, որովհետև մերն է». Սահմանապահ համայնքն՝ այսօր (լուսանկարներ)
ՍՏԵՓԱՆԱԿԵՐՏ 11 մարտի, ԱՐՑԱԽՊՐԵՍ։ Այսօր՝ մարտի 14-ին, «Արցախպրես»-ի թղթակիցը այցելել է Թաղավարդ համայնք, զրուցել բնակիչների հետ ու ծանոթացել գյուղում տիրող տրամադրություններին:
Համայնքի ղեկավար Օլեգ Հարությունյանի խոսքով՝ մարտի 12-ից մինչ օրս հակառակորդը հրադադարի պահպանման ռեժիմը չի խախտել:
«Թշնամին իր դիրքերից կրակ է բացում բնակչության շրջանում խուճապ առաջացնելու համար, ինչպես նաև գյուղը լքելու կոչեր է անում: Սակայն այս ամենը բնակիչների համար դարձել է սովորական, և նրանց շրջանում խուճապ չկա: Շատ հաճախ նամազ են միացնում, փորձում լսելի դարձնել նաև մեզ: Երբեմն խոչընդոտում են մեր կողմից կատարվող գյուղատնտեսական աշխատանքներին, սակայն մենք շարունակում ենք մեր գործը. արտերի սնուցումն արդեն ավարտել ենք, եղանակային պայմանների բարելավումից անմիջապես հետո կանցնենք մեր հիմնական աշխատանքների իրականացմանը»,-ներկայացրել է համայնքապետը:
Համայնքի ավագանու անդամ Ռուդիկ Բադասյանը մեզ հետ զրույցում փաստեց՝ գյուղացիերի համար հակառակորդի կողմից իրականացվող սադրիչ գործողությունները գնալով սովորական են դառնում:
«Բնակչության շրջանում որևէ խուճապ չկա: Միայն թե գյուղատնտեսական աշատանքներ իրականացնելու ժամանակ նրանք կրակում են: Բայց ուրախալին այն է մեզ համար, որ այսօր ռուս խաղաղապահները բարձրախոսով երեք լեզվով՝ հայերեն, ռուսերեն և թուրքերեն, հնչեցրել են 2020 թվականի նոյեմբերի 9-ին կայացած եռակողմ համաձայնագրի կետերը՝ հիշեցնելով հակառակորդին, որ հրադադար է, և ռազմական բոլոր տեսակի գործողությունները բացառվում են»,-նշել է Ռ. Բադասյանը:
Համայնքի 75-ամյա բնակչուհի տիկին Սիլվայի խոսքով՝ Թաղավարդն աշխարհի ամենալավ բնակավայրն է, որովհետև իրենցն է։
«Ուրիշ գնալու տեղ չունեմ, ինչ ունեմ, գյուղում է: Չորս թոռներիս հետ միասին ապրում ու արարում ենք այստեղ, զբաղում ենք անասնապահությամբ ու թռչնաբուծությամբ, թշնամու կողմից հնչեցվող սպառնալիքներն էլ արհամարհում ենք»,-վստահեցրել է տիկին Սիլվան:
