Աշխատանքային այցով Ֆրանսիայում են ԱՀ նախագահի խորհրդականներ Ազատուհի Սիմոնյանն ու Լուսինե Ղարախանյանը: Այցի ընթացքում նախատեսվում են հանդիպումներ ֆրանսահայ համայնքի կառույցների ու անհատների հետ:
Աշխատանքային այցով Ֆրանսիայում են ԱՀ նախագահի խորհրդականներ Ազատուհի Սիմոնյանն ու Լուսինե Ղարախանյանը
ՍՏԵՓԱՆԱԿԵՐՏ 15 մարտի, ԱՐՑԱԽՊՐԵՍ։ Այս մասին «Արցախպրես»-ին տեղեկացրեց Ա. Սիմոնյանը` մանրամասնելով, որ նախատեսվում են այցելություններ ֆրանսահայ դպրոցներ` նոր կապեր ստեղծելու նպատակով, ինչպես նաև ֆրանսահայ դպրոցների հետ քննարկելու «Քույր դպրոցներ» ծրագիրը:
«Այսօր տեղի է ունենալու Արցախի օկուպացված տարածքների պատմամշակութային ու պատմաճարտարապետական հուշարձանների լուսանկարների ցուցահանդեսի բացումը` կազմակերպված Արևելյան Քրիստոնյաներ L’oeuvre d’Orient կազմակերպության կողմից: Իսկ մինչ այդ մենք Ֆրանսիայի Հանրապետությունում ԱՀ մշտական ներկայացուցիչ Հովհաննես Գևորգյանի ուղեկցությամբ այցելել ենք Փարիզում ՀՀ դեսպանատուն, հանդիպել Ֆրանսիայում ՀՀ արտակարգ և լիազոր դեսպան Հասմիկ Դոլմաջյանի հետ: Այնուհետև տեղի է ունեցել ճանաչողական այց Սևր քաղաքի Մուրադ Ռաֆաելյան հայկական վարժարան, որի ընթացքում ծանոթացել ենք վարժարանի պատմական հարուստ անցյալին, ապագա ծրագրերին»,- նշել է մեր զրուցակիցը:
Ազատուհի Սիմոնյանը և Լուսինե Ղարախանյանը ծաղիկներ խոնարհել Կոմիտասի հուշարձանին:
