ԱՀ Մարտունու շրջանի Նորշեն համայնքի միջնակարգ դպրոցում 54 աշակերտ է սովորում:
«Հաճախակի կազմակերպվող միջոցառումներն ապրեցնում են գյուղը». Նորշենի դպրոցի տնօրենը կարեւորում է ռազմահայրենասիրական դաստիարակությունը
ՍՏԵՓԱՆԱԿԵՐՏ, մարտի 17, ԱՐՑԱԽՊՐԵՍ։ Նրանք ամեն օր հակառակորդի ուղիղ նշանառության տակ հաճախում են դպրոց և բնականոն հունով անցկացնում դասապրոցեսը:
Այս մասին «Արցախպրես»-ի թղթակցի հետ զրույցում ասել է դպրոցի տնօրեն Սամվել Ավանեսյանը:
«Կրթօջախը կրում է մեր համագյուղացի բանաստեղծ, գրող, հրապարակախոս, քննադատ Լեոնիդ Հուրունցի անունը:Ունենք 23 ուսուցիչ. Նրանք լավ են տիրապետում իրենց մասնագիտությանը և զինված են անհրաժեշտ գիտելիքներով: Վազգենաշենից տեղահանված ընտանիքի մեկ երեխա ենք ընդունել մեր կրթօջախում»,-ասել է Ս. Ավանեսյանը:
Մեր զրուցակիցը նշել է, որ դպրոցում հաճախակի են կազմակերպվում տարաբնույթ միջոցառումներ, ինչն իր հերթին այս ծանր ժամանակաշրջանում շարունակում է ապրեցնել գյուղը։
«Կազմակերպում ենք տոնական միջոցառումներ, հանդիպումներ ռուսական խաղաղապահ ուժերի հետ: Անցած տարի էլ ավտոմատացված զանգի միջոցառում է կազմակերպվել, որին ներկա էին ԱՀ ԿԳՄՍ նախարարը, հասարակական կազմակերպություններ, բարեգործներ, ովքեր հովանավորել են ծրագիրը»,-նշեց նա:
Դպրոցի տնօրենը հավաստիացրել է, որ աշակերտների մոտ խուճապային տրամադրություններ չկան:
«Նրանք չեն տրվում սադրանքների, բայց թշնամու դիրքից հնչեցվող ձայնագրությունները, գյուղը լքելու հայալեզու կոչերը անհանգստություն են պատճառում նրանց: Այս պահին, գազամատակարարման դադարեցմամբ պայմանավորված, ջեռուցման բացակայության պատճառով դասապրոցեսը չի ընթանում. Ջեռուցման կարգավորումից հետո կանցնենք բնականոն ընթացքի»,-հավաստիացրել է նա:
Ս. Ավանեսյանի խոսքով՝ այսօր կրթությունը պետք է միտված լինի ռազմահայրենասիրական դաստիարակությունը ավելի բարձր մակարդակի հասցնելուն, որի ուղղությամբ դպրոցում աշխատանքներ են տարվում:
Որպես կրթօջախի խնդիր՝ մեր զրուցակիցը նշել է շենքի ներսում սանհանգույց և ջուր չունենալու հանգամանքը: Հարցի կարգավորումից հետո դպրոցը կներգրավվի «Երկարօրյա դպրոց» ծրագրում:
