Կայացել է Արցախ-Սփյուռք «Քույր դպրոցներ» ծրագրի առաջին փուլը։ Ծրագրին մասնակցում են ԱՀ Մարտակերտի շրջանի և Լիբանանի Հանրապետության հայկական դպրոցները։
«Քույր դպրոցներ» ծրագիրը` միասնական հայրենիք ստեղծելու գաղափարական ազդակ. կայացել է նախաձեռնության առաջին փուլը
ՍՏԵՓԱՆԱԿԵՐՏ 6 ապրիլի, ԱՐՑԱԽՊՐԵՍ։ Այս մասին «Արցախպրես»-ին տեղեկացնում են ԱՀ ԿԳՄՍ նախարարությունից։ Աղբյուրի հաղորդմամբ` ԱՀ ԿԳՄՍ նախարարության և ԱՀ նախագահի Սփյուռքի հարցերով խորհրդականի գրասենյակի համատեղ մշակմամբ՝ «Քույր դպրոցներ» ծրագիրն ընթացքի մեջ է և կրում է ինստիտուցիոնալ և շարունակական բնույթ:
Առաջին փուլում ԱՀ Մարտակերտի շրջանի հինգ միջնակարգ դպրոցները՝ Մարտակերտի թիվ 1, Հաթերքի, Վաղուհասի, Գետավանի և Մաղավուզի, քույրացման ծրագրի մեջ են Լիբանանի Հանրապետության հինգ դպրոցների հետ՝ ՀԲԸՄ Պողոս Կ.Գարմիրյան դպրոց, Հայ Ավետարանական քոլեջ - ավագ դպրոց, Վահան Թեքեյան վարժարան, Հայ Կաթողիկե Սուրբ Խաչ Հարպոյան ավագ դպրոց, Հայ Ավետարանական կեդրոն բարձրագույն դպրոց:
Օրերս ZOOM հարթակում դպրոցների միջև տեղի են ունեցել ծանոթության հանդիպումներ և առաջիկա ծրագրերի մշակմանը նվիրված քննարկումներ:
Հանդիպումներն անցել են ջերմ մթնոլորտում՝ երկուստեք կարևորելով «Քույր դպրոցներ» ծրագրի խիստ անհրաժեշտությունը և ծրագրի միջոցով Արցախ - Սփյուռք կապի է’լ ավելի սերտացումը:
Ծրագիրն իրականացվում է ԱՀ նախագահի խորհրդականներ Լ. Ղարախանյանի, Ա. Սիմոնյանի և ԱՀ ԿԳՄՍ նախարարի խորհրդական Ա. Գյանջումյանի անմիջական մասնակցությամբ:
«Քույր դպրոցներ» ծրագիրը կդառնա միասնական հայրենիք ստեղծելու գաղափարական ազդակներից մեկը:
