Այսօր՝ ապրիլի 10-ին, Արցախի Հանրապետության Մարտունու շրջանի Բերդաշեն համայնքում անց է կացվում համայնքապետի արտահերթ ընտրություն:
Բերդաշենում համայնքապետ են ընտրում. ընտրություններն անց են կացվում ըստ սահմանված կարգի
ՍՏԵՓԱՆԱԿԵՐՏ, 10 ապրիլի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ՝ համայնքապետի ընտրություններին իրենց թեկնածությունն են առաջադրել Կարո Պողոսյանը, Նվեր Զարգարյանը և Գեորգի Պողոսյանը:
Հանձնաժողովի նախագահ Զարմիկ Ասրյանը մեզ հետ զրույցում նշել է, որ համայնքում ընտրելու իրավունք ունի 1052 հոգի:
«Ժամը14:00-ի դրությամբ ընտրողների ընդհանուր թվից իր քաղաքացիական պարտքն է կատարել 353 ընտրող: Բոլորը ծանոթ են կարգին, որևէ խախտում չի արձանագրվել: Կեսօրից հետո ընտրողների թիվը, համոզված եմ, կմեծանա»,-ասել է Զ. Ասրյանը:
Համայնքապետի թեկնածու Գեորգի Պողոսյանն իր թեկնածությունն առաջադրել է ` արդեն իսկ ունենալով գյուղի զարգացմանը նպաստող ծրագրեր:
«Գյուղում այսօրվա դրությամբ ունենք ջրի շատ լուրջ խնդիր, ներհամայնքային ճանապարհները բարեկարգման կարիք ունեն: Մանավանդ ամառային շրջանում ջրի պակասը շատ է զգացվելու, և, ոռոգման ջրի առկայության դեպքում, հնարավոր կլինի մշակած այգուց ստանալ մեծ քանակությամբ բերք»,-նշել է Գ. Պողոսյանը:
Հիշեցնենք, որ այսօր՝ ապրիլի 10-ին, տեղական ինքնակառավարման մարմինների արահերթ ընտրություններ են անցկացվում Արցախի Մարտունու շրջանի Բերդաշեն (համայնքի ղեկավարի), Նորշեն, Ծովատեղ, Սոս, Վարանդա (ավագանու անդամների) համայնքներում և Շահումյանի շրջանի Ակնաբերդ (ավագանու անդամների) համայնքում: