ԱՀ Ասկերանի շրջանի Խաչմաչ համայնքի բնակիչների զբաղվածության հիմնական ուղղությունը գյուղատնտեսությունն է՝ անասնապահությունն ու հողագործությունը. շատ են հացահատիկային մշակաբույսերի աճեցմամբ զբաղվողները։ Ունենք 280 հա հողատարածք:
Խաչմաչում գյուղատնտեսական եռուզեռ է. բնակիչներն այդպես են շեն պահում գյուղը
ՍՏԵՓԱՆԱԿԵՐՏ, ապրիլի 12, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասաց Խաչմաչ համայնքի ղեկավար Մխիթար Ղահրիյանը:
«Բնակիչները շարունակում են արարել հայրենի Խաչմաչում, հող են մշակում, ծառ տնկում, գյուղը շենացնում: Մեր տեղանքը բարենպաստ է անասնապահությունը զարգացնելու համար, բայց գյուղատնտեսության այդ ճյուղով զբաղվողները մեծ թիվ չեն կազմում: Պատերազմից հետո տեղահանված տասներկու բնակիչ է հաստատվել այստեղ, նրանք ապահովվել են աշխատանքով և ներգրավվել գյուղատնտեսական աշխատանքներում: Բնակչության տրամադրվածությունն, ընդհանուր առմամբ, դրական է»,-ներկայացրել է համայնքապետը:
Նրա տեղեկացմամբ՝ 44-օրյա պատերազմի ընթացքում վնասվել են երեք բնակելի տներ ու հանդիսությունների սրահը, դրանք վերանորոգվել են ԱՀ Քաղաքաշինության նախարարության աջակցությամբ:
2015 թվականին ԱՀ կառավարության և «Խաչմաչ» հիմնադրամի համաֆինանսավորմամբ կառուցվել է համայնքային կենտրոն` ժամանակակից պայմաններով, որտեղ տեղակայված են բուժկետը, մշակույթի տունը, գրադարանը։ Ներհամայնքային բոլոր ճանապարհները սալապատված են:
«Արցախյան ազատամարտի հերոսամարտիկ Շահեն Սարգսյանի անունը կրող դպրոցում հայրենասիրական վեհ գաղափարներով կրթվում և դաստիարակվում է 42 աշակերտ, ինչն այսօր, առավել քան երբևէ, անհրաժեշտություն է և առաքելություն: Մանկապարտեզ չունենք, սակայն շատ կցանկանայինք ունենալ, որպեսզի գյուղի երեխաները մանկապարտեզ ևս հաճախեին: Ունենք խաղահրապարակ, որն ապահովում է նախադպրոցական տարիքի երեխաների ժամանցը»,-նշել է Մ. Ղահրիյանը՝ հավելելով, որ բնակիչներն ապահովված են գազով, էլեկտրաէներգիայով ու ջրով:
