ՍՏԵՓԱՆԱԿԵՐՏ 17 ապրիլի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում միջոցառման նախաձեռնող խմբի անդամ Մասիս Զարգարյանը նշել է, որ կազմակերպչական աշխատանքներում ընդգրկված էին «Դասավանդի՛ր, Հայաստան» կրթական հիմնադրամը, Բերդաշենի համայնքապետարանը, համայնքի Մոնթե Մելքոնյանի անվան միջնակարգ դպրոցի սաները և, իհարկե,  բերդաշենցիները։

 

«Միջոցառմանը ներկայացվել է ժենգյալով հացի պատրաստման ընթացքը,  ժենգյալով հացի և տեղական, այդ թվում` Berdashen Wine գինիների հյուրասիրություն է եղել։ Ներկայացվել են  ազգային պարեր, արցախյան բարբառի և մշակույթի վերաբերյալ խաղ է կազմակերպվել, ձեռագործ հուշանվերների ցուցադրություն, ինքնաեռով և տեղական խոտաբույսերով թեյի հյուրասիրություն, զատկական փլավ ու կարմիր ներկած ձու է մատուցվել։ Կատարել ենք նաև շրջայցեր դեպի գյուղի պատմամշակութային վայրեր։ Մասնակցել է շուրջ երկու հազար մարդ»,-նշել է մեր զրուցակիցը։

 

Մ. Զարգարյանի խոսքով՝ միջոցառմանն ապահովված էր բարձր տրամադրությունն ու տոնական օրվա խորհրդի արժևորումը։

 

«Փորձել ենք, և կարծում եմ, որ ստացվել է բոլորին համախմբել Արցախը հայեցի պահելու գաղափարի շուրջ, կտրել առօրյա հոգսերից, համացանցի տեղեկատվական տարափից, վերագտնել ու վերաիմաստավորել բերդաշենցու՝ հյուրասիրողի համբավը, արցախցիներին ծանոթացնել Արցախի՝ մեր այս չքնաղ հատվածին, հիշեցնել բոլորին, որ մենք հայ ենք, և սա մեր հայրենիքն է»,-ընդգծել է նա։

 

Միջոցառմանը ներկա էին ԱՀ պետնախարար Արտակ Բեգլարյանը, ԱՀ Արդարադատության նախարար Ժիրայր Միրզոյանը,  ԿԳՄՍ նախարար Անահիտ Հակոբյանը, պետական տարբեր գերատեսչություններից աշխատանքային կոլեկտիվներ, շրջվարչակազմի ղեկավարի տեղակալն, Արցախի բոլոր յոթ շրջաններից, մայրաքաղաք Ստեփանակերտից ու Հայաստանի Հանրապետությունից հյուրեր։