Նախօրեին ԱՀ ԿԳՄՍ նախարարության երիտասարդության հարցերի բաժնի նախաձեռնությամբ «Երիտասարդական միջոցառումներ Արցախի Հանրապետության սահմանամերձ բնակավայրերում» ծրագրի շրջանակներում, ԱՀ Մարտունու շրջանի Սոս համայնքի Հայկ Հակոբյանի անվան միջնակարգ դպրոցում կազմակերպվել է միջոցառումների համալիր ծրագիր, որին մասնակցում էին նաև երիտասարդներ հարակից գյուղերից։ Ծրագիրն իր մեջ ներառում էր «Տեղեկատվական անվտանգություն» թեմայով դասախոսություն, ազգային պարի ու խաղի ուսուցում։
Սոս համայնքում «Տեղեկատվական անվտանգություն» թեմայով դասախոսություն է կազմակերպվել
ՍՏԵՓԱՆԱԿԵՐՏ 20 ապրիլի, ԱՐՑԱԽՊՐԵՍ: «Արցախպրես»-ի թղթակցի հետ զրույցում ԱՀ ԿԳՄՍ նախարարության երիտասարդության հարցերի բաժնի վարիչ Արևիկ Հովսեփյանը նշել է, որ հետպատերազմական իրավիճակում երիտասարդության շրջանում տեղեկատվական անվտանգության՝ առնվազն տարրական կանոնների իմացությունը, երիտասարդության բարոյահոգեբանական վիճակը, սոցիալական խնդիրները, տեղահանված երիտասարդության ինտեգրումը այլ համայնքներում, տարբեր համայնքների երիտասարդության և ներհամայնքային կապերի ամրապնդումն այսօր, առավել քան երբևէ, առաջնահերթ են սահմանամերձ համայնքներում բնակվող երիտասարդների հոգեբանորեն անվտանգ, կայուն, ակտիվ կյանքի համար:
«Մինչ դասախոսության սկսվելը հարգանքի տուրք մատուցեցինք գյուղի զոհված ազատամարտիկների հուշարձանին։ Իսկ բուն միջոցառումը մեկնարկեց Ամարասի հոգևոր հովիվ տեր Սեպուհ քահանա Հակոբյանի օրհնության խոսքով։ Հակառակորդի կողմից տարվող տեղեկատվական պատերազմին դիմակայելու և, անհրաժեշտության դեպքում, հակահարված տալու համար խիստ հրատապ խնդիր է, որպեսզի մեր հասարակությանը տրամադրվեն համապատասխան գիտելիքներ և ռեսուրսներ, ինչն էլ կնպաստի Արցախում տեղեկատվական անվտանգության մակարդակի բարձրացմանը։
Հաշվի առնելով վերոնշյալը` ԱՀ ԿԳՄՍ նախարարությունը նախաձեռնել է Արցախի Հանրապետության Սոս համայնքում ավագ դպրոցականների համար տեղեկատվական անվտանգության թեմայով դասախոսության կազմակերպել, որը վարում էր ԱՀ Հեռուստառադիոընկերության աշխատակից Արթուր Բալասանյանը»,-ներկայացրել է Ա. Հովսեփյանը։
Դասախոսությանը զուգահեռ` 6-12 տարեկան երեխաների համար անց է կացվել «Նաղաշ» մշակութաժամանցային ծրագիր։ Այնուհետև կազմակերպվել է ազգային պարերի ու ազգային խաղերի ուսուցում։