ՍՏԵՓԱՆԱԿԵՐՏ 23 ապրիլի, ԱՐՑԱԽՊՐԵՍ։ Միասնական աղոթքից հետո ՀՅԴ Արցախի երիտասարդական միության նախաձեռնությամբ մեկնարկել է  «Զարթնի՛ր, լաո՛» խորագրով ջահերթ։ Մասնակիցները ջահերով շարժվել են դեպի Ստեփանակերտի հուշահամալիր՝ տանելով Արցախի՝  100մ երկարություն ունեցող դրոշը։

 

ԱՀ ԿԳՄՍ փոխնախարար, ՀՅԴ կուսակցության անդամ Լեռնիկ Հովհաննիսյանն «Արցախպրես»-ի թղթակցի հետ զրույցում նշեց, որ, դեռևս 1911 թվականից սկսած, Սալոնիկի ժողովում  երիտթուրքերը հստակ մշակեցին այն ռազմավարական ծրագիրն ու ռազմավարությունը, որն այսօր Թուրքիայի հիմնական  գաղափարախոսությունն է, որի մեջ այսօր օգտագործում է նաև իր արհեստածին միավորումը՝ Ադրբեջանը։

 

«Նրանց ցեղասպանական քաղաքականությունը չի փոխվել, պարզապես փոխվել են մարտավարությունն ու մեթոդները, և, սկսած 1915թվականի Հայոց ցեղասպանությունից մինչև այսօր, նույն ցեղասպան քաղաքականությունն է, որը ոչ միայն հայ բնակչության ոչնչացումն է, ոչ միայն տարածքների բռնազավթումն է, այլ նաև մշակութային էթնոցիդիկ քաղաքականությունն է, այսինքն՝ հայի ինքնության ամենակարևոր հարացույցների ոչնչացումը, որը մինչ օրս շարունակվում է, և մենք ականատես ենք լինում դրան։ Արդեն 107 տարի  հայասպան դիրքորոշումն ընկած է Թուրքիայի և նրա արբանյակ արհեստածին Ադրբեջանի քաղաքականության հիմքում»,-մանրամասնել է Լ. Հովհաննիսյանը։

 

Պատմաբան Արմինե Առստամյանն իր հերթին կարևորել է ավանդական դարձած ջահերթի էությունն ու նշել, որ յուրաքանչյուր հայ պարտավոր է  միշտ էլ հիշել հայոց ազգային ողբերգությունը։

 

«Մենք պարտավոր ենք հիշել ու լինել պահանջատեր։ Պետք է ոչ միայն արարենք ու ստեղծագործենք այստեղ, այլև աշխատանքներ տանենք Ցեղասպանության միջազգային ճանաչման ուղղությամբ։ Այն ոճրագործություն է, որն անպատիժ թողնելը ծնում է նոր հանցանքներ։ Ցեղասպանություն իրագործող պետությունը պետք է ստանա իր արժանի պատիժը և հատուցի իր կատարած մեղքի համար, որը կլինի սաստող մյուս պետությունների համար»,-ասել է Ա. Առստամյանը։

 

Ջահերթի մասնակից ԱրՊՀ պրոռեկտոր Վիտյա Յարամիշյանի համոզմամբ՝ այն, ինչ տեղի է ունեցել հայ ժողովրդի հետ 1915 թվականին և կրկնվել է տասնամյակներ հետո,  նույն ձեռագիրն ու հանցագործությունն է մարդկության հանդեպ։

 

«Այսօրվա երթը հուսահատ ճիչ չէ, այլ մի տարբերակ է վերհիշելու և թարմ պահելու հիշողությունները, և մարդկությանը կոչ անելու ուշքի գալ,  թույլ չտալ, որ այլևս նման հանցագործություն կրկնվի»,-նշել է նա։

 

Երթն ամփոփվել է Ստեփանակերտի հուշահամալիրում, մասնակիցները ծաղիկներ են խոնարհել հերոսների շիրիմներին, որից հետո կատարվել է մոմավառություն։

 

Նշենք, որ ավանդական դարձած ջահերթին մասնակցել են ԱՀ նախագահ Արայիկ Հարությունյանը, ԱՀ երրորդ նախագահ Բակո Սահակյանը, բարերար Ռուբեն Վարդանյանը, օրենսդիր և գործադիր մարմինների ներկայացուցիչներ։