Այսօր՝ մայիսի 9-ին, Ստեփանակերտի Աստվածամոր Սուրբ Հովանի Մայր Տաճարում կատարվել է հոգեհանգստի կարգ` ի հիշատակ Մեծ հայրենական, Արցախյան առաջին, Ապրիլյան և 44-օրյա պատերազմներում նահատակված հերոսների:
Ստեփանակերտի Աստվածամոր Սուրբ Հովանի Մայր Տաճարում կատարվել է հոգեհանգստի կարգ
ՍՏԵՓԱՆԱԿԵՐՏ, մայիսի 8, ԱՐՑԱԽՊՐԵՍ: «Արցախպրես»-ի թղթակցի հետ զրույցում ՀԱԵ Արցախի թեմի առաջնորդ, Գերաշնորհ Տեր Վրթանես եպիսկոպոս Աբրահամյանը նշել է, որ եթե կյանքի հիմքում դնենք Քրիստոսի հարության գաղափարը, ապա կունենանք հաղթանակներ:
«Եթե Քրիստոսի Հարությունը ժամանակ առ ժամանակ ենք ընդունում, ապա մեր հաղթանակներն էլ ժամանակ առ ժամանակ են լինում: Առանց հարության չկա քրիստոնեություն, առանց հարության չկա հայություն: Հարությունը և հայությունը շատ կապված են իրար հետ: Եվ եթե մենք քայլում ենք Քրիստոսի հրաշափառ ճանապարհով, ուրեմն պետք է հավատարիմ լինենք: Մեր հայրերը 1988 թվականի շարժմանն այդ հավատարմության գիծն են բռնել՝ մտածելով, որ Աստված ընդ մեզ է, և չեն շփոթվել: Ես չգիտեմ, թե ինչ էին մտածում մեր նվիրյալ զինվորականները, երբ Շուշիի ազատագրման օպերացիայի գործողությունը անվանում էին «Հարսանիք լեռներում», և քրիստոնեական տեսանկյունից, իրապես, հարսանիք տեղի ունեցավ, հարսը Շուշին էր, իսկ մեր քաջարի զինվորները փեսաներն էին, որոնց մեջքին դրոշմված էր խաչը, որն օրհնում էր այդ հարսանիքը, իսկ Սուրբ գիրքն ասում է՝ «Այն, որն Աստված միացնում է, մարդն իրավունք չունի բաժանել»,-նշել է Տեր Վրթանես եպիսկոպոս Աբրահամյանը:Հոգեհանգստյան կարգի ավարտից հետո Մայր Տաճարից Հայոց բանակի պահապան Աշոտ Երկաթի պատմական Սուրբ Խաչի առաջնորդությամբ մեկնարկել է խաչերթ դեպի Ստեփանակերտի հուշահամալիր, որտեղ հոգևորականները հարգանքի տուրք են մատուցել Մեծ հայրենականում, Արցախյան առաջին, Ապրիլյան և 44-օրյա պատերազմներում հանուն հայրենիքի զոհվածների հիշատակին:
Հոգեհանգստի կարգին մասնակցում էին ԱՀ պետնախարար Արտակ Բեգլարյանը, ԱՀ սոցիալական զարգացման և միգրացիայի նախարար Արմինե Պետրոսյանը, ամերիկահայ պետական, քաղաքական գործիչ Րաֆֆի Հովհաննիսյանը, ՊԲ զինվորականներ։
