ԱՀ Մարտունու շրջանի Սոս համայնքի բնակիչները տարվա այս եղանակին գյուղատնտեսական աշխատանքներով են զբաղված:
Սոսում մշակվել են գյուղին պատկանող բոլոր խաղողայգիները. Համայնքն՝ այսօր
ՍՏԵՓԱՆԱԿԵՐՏ, մայիսի 10, ԱՐՑԱԽՊՐԵՍ։ Այս մասին «Արցախպրես»-ի թղթակցի հետ զրույցում ասել է Սոս համայնքի ղեկավար Հունան Գրիգորյանը։
Նրա խոսքով՝ գյուղում աշխատասեր, սեփական քրտինքով հաց վաստակող ու հայրենիքը սիրող արցախցին է ապրում:
«Մեր համայնքում գրեթե բոլոր տնտեսություններն էլ գարնանացան մշակաբույսեր են ցանել: Խաղողայգիներում աշխատանքը չի էլ դադարել, տղամարդիկ, մեկը մյուսին թև ու թիկունք լինելով, գյուղին պատկանող ողջ խաղողայգիները մշակել են: Վերջին օրերին տեղացած առատ անձրևները չեն խանգարել գյուղատնտեսական աշխատանքների ակտիվ ընթացքին: Կարելի է ասել՝ տեղումները նույնիսկ նպաստում են, որ գարնանացան մշակաբույսերից ստացված բերքն առատ լինի»,-նշել է համայնքապետը:
Հ. Գրիգորյանի հավաստմամբ՝ Սոսում իր բնականոն գործունեությունն է իրականացնում Արցախյան առաջին գոյապայքարում նահատակված Հայկ Հակոբյանի անունը կրող միջնակարգ դպրոցը, այստեղ ուսուցիչները կրթում ու դաստիարակում են 168 աշակերտների:
«Մեր դպրոցը և´ շրջանում, և´ Հանրապետությունում բազմիցս աչքի է ընկել: Դպրոցի թիմը սպորտային միջոցառումներին ակտիվ մասնակցություն է ունեցել և բազմաթիվ հաղթանակներ բերել կրթօջախին: Աշակերտներից շատերն էլ առարկայական տարբեր օլիմպիադաներում մրցանակային տեղեր են զբաղեցրել: Նորակառույց մանկապարտեզ է հաճախում 31 սան: Բուժկետը, համայնքապետարանը ևս իրենց բնականոն գործունեությունն են իրականացնում: Հետպատերազմական ժամանակաշրջանում գյուղի երիտասարդները նոր ընտանիքներ են կազմում, ինչն ապացուցում է, որ արցախցուն ընկճելն ու թևաթափ անելն այդքան էլ հեշտ բան չէ, նույնիսկ անհնար է»,-ընդհանրացրել է մեր զրուցակիցը:
