Մեծ Յոթնյակի (G7) երկրների ֆինանսների նախարարները և կենտրոնական բանկերի ղեկավարները ռուսական նավթի ներմուծման հնարավոր սահմանափակումների վերաբերյալ՝ հինգշաբթի օրը կայացած հանդիպման ժամանակ չեն կարողացել գալ համաձայնության:
G7-ի երկրները ռուսական նավթի ներմուծման սահմանափակումների վերաբերյալ ընդհանուր որոշման չեն հանգել
ՍՏԵՓԱՆԱԿԵՐՏ 20 մայիսի, ԱՐՑԱԽՊՐԵՍ։Այս մասին լրագրողներին հայտնել է ԱՄՆ ֆինանսների նախարար Ջանեթ Յելենը ամփոփելով երկօրյա հանդիպման առաջին օրվա արդյունքները, որը տեղի է ունենում Բոննի մերձակայքում գտնվող Քյոնիգսվինթեր քաղաքի Պետերբերգ հյուրանոցում։
Նրա խոսքով՝ ամերիկյան կողմը առաջարկել է մաքսատուրքեր սահմանել ռուսական նավթի ներկրման վրա՝ Մոսկվայի եկամուտը սահմանափակելու նպատակով՝ միաժամանակ պահպանելով Ռուսաստանից էներգակիրների մատակարարումների ծավալը։
Միևնույն ժամանակ, եվրոպական երկրների ներկայացուցիչները ձգտում էին մինչև տարեվերջ սահմանել փուլային էմբարգո։ Յելենի խոսքով՝ ռուսական նավթի գնորդները կարող են համաձայնության գալ, ըստ որի՝ նրանք չեն գնի սև ոսկի որոշակի մակարդակը գերազանցող գներով։ Նա կարծում է, որ նման նախաձեռնությունը հաջող կլինի, եթե դրան միանան հնարավորինս շատ երկրներ։
Նախարարի խոսքերը մեջբերել է Reuters գործակալությունը։ Յելենն ընդգծել է, որ հանդիպման առաջին օրը քիչ է քննարկվել Եվրոպա նավթի արտահանումից Ռուսաստանի եկամուտների կրճատման մեխանիզմները, սակայն այս առաջարկի նկատմամբ հետաքրքրությունը մեծ է։
Ավելի վաղ գործակալությունը հայտնել էր, որ G7 երկրները որոշել են Ուկրաինային տրամադրել 18,4 մլրդ դոլարի ֆինանսական օգնություն, սակայն ամերիկացի նախարարը հրաժարվել է հաստատել այդ թիվը, ընդգծելով, որ հատկացված միջոցների չափը գերազանցել է 15 մլրդ դոլարը։
Նշենք, որ Եվրահանձնաժողովի (ԵՀ) կողմից առաջարկված Ռուսաստանի դեմ պատժամիջոցների վեցերորդ փաթեթը ներառում է նավթի հետաձգված էմբարգոյի նախագիծ։ Դրանով առաջարկվում է Ռուսաստանի Դաշնությունից հում նավթի ներմուծման արգելք մտցնել սույն օրենքի ուժի մեջ մտնելուց վեց ամիս հետո։ Միաժամանակ ԵՀ-ն առաջարկել է Հունգարիային և Սլովակիային թույլատրել ռուսական նավթ գնել մինչև 2024 թվականի վերջ։
Աղբյուրների համաձայն՝ Եվրահանձնաժողովն արդեն ստիպված է եղել մեղմել իր կողմից առաջարկված մի շարք առաջարկներ նավթի էմբարգոյի ժամկետների և հնարավոր բացառությունների վերաբերյալ։ Հունգարիան դեմ է նավթի էմբարգոյին՝ մի շարք այլ երկրների աջակցությամբ, որոնք կարծում են, որ դրանով վնասը աղետալի կլինի Եվրոպայի համար։
