Այսօր՝ հունիսի 10-ին, «Դասավանդի´ր, Հայաստան» կրթական ծրագրի կողմից ԱՀ Մարտունու շրջանի Ննգի համայնքի միջնակարգ դպրոցում բացվել է «Լուսատտիկ» գրական ակումբը:
Ննգու միջնակարգ դպրոցում գրական ակումբ է բացվել
ՍՏԵՓԱՆԱԿԵՐՏ, 10 հունիսի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում «Դասավանդի´ր, Հայաստան» կրթական ծրագրի շրջանակներում Ննգու միջակարգ դպրոցում դասավանդող Հայոց լեզվի և գրականության ուսուցչուհի Սոսե Քոչարյանը նշել է․
«Աշակերտների հետ համատեղ ունեցել ենք փոփոխությունների վրա հիմնված ուսումնառություն, որի շնորհիվ աշակերտներն ընտրել են գրական ակումբ բացելու ծրագիրը: Ակումբը «Լուսատտիկ» ենք կոչել՝ ցանկանալով, որ երեխաներն իրենց ընթերցասիրությամբ ու գիտելիքներով լույս սփռեն միապաղաղ առօրյայի վրա»,-նշեց Ս. Քոչարյանը:
Նա տեղեկացրեց, որ ակումբի գրքերը, ընդ որում՝ մեր հերոսների՝ Մոնթե Մելքոնյանի, Գարեգին Նժդեհի մասին, ինչպես նաև մանկապատանեկան, արկածային գեղարվեստական գրականություն, ձեռք են բերել «Դասավանդի´ր, Հայաստան» -ի և այլ կազմակերպությունների շնորհիվ:
«Աշակերտներին խունացած կազմով գրքերն այդքան էլ չեն հետաքրքրում, նրանց ուշադրությունը գրավում են գունազարդները։ Այդ իսկ պատճառով ամբողջ գրականությունը նոր ու գեղեցիկ կազմով է»,-մանրամասնել է մեր զրուցակիցը:
«Դասավանդի´ր Հայաստան» կրթական ծրագրի Արցախի գրասենյակի առաջնորդության զարգացման ղեկավար Նարինե Վարդանյանի խոսքով՝ ներկայում աշակերտական ծրագրեր են իրականացնում 23 համայնքում:
«Բոլոր այդ համայնքներում ունենք ուսուցիչ-առաջնորդներ, ովքեր իրականացնում են աշակերտական ծրագրեր, որոնք ընտրվել են աշակերտների կողմից: Ննգիի դպրոցի աշակերտներն ավելի շատ հակված են դեպի գիրքը, որի շնորհիվ կարողանում են շատ տեղեկություններ ստանալ աշխարհի մասին»,-նշեց Ն. Վարդանյանը:
Դպրոցի տնօրեն Էլեոնորա Քամալյանը շնորհակալություն է հայտնել «Դասավանդի´ր, Հայաստան»-ին և բոլոր նվիրատուներին:
Նա հույս է հայտնել, որ ակումբի բացումը խթան կհանդիսանա, որպեսզի աշակերտներն ավելի շատ սիրեն գիրքն ու գրականությունը, քանզի գիրքն ամենալավ ուսուցիչն է մարդու կյանքում: Դպրոցի աշակերտուհի Քրիստինե Նասիբյանը մեզ հետ զրույցում անկեղծացավ՝ շատ մեծ ուշադրություն է դարձնում ընթերցանությանը:
«Այսուհետ ավելի մեծ ոգևորությամբ կընթերցենք մեր ստացած նոր ու գունագեղ գրքերը»,-ասաց Ք. Նասիբյանը: Միջոցառմանը դպրոցի աշակերտները հանդես եկան ասմունքով ու երաժշտական կատարումներով, որից հետո նրանք նվերներ ստացան «Դասավանդի՛ր, Հայաստան» կրթական ծրագրի կողմից։
