ՍՏԵՓԱՆԱԿԵՐՏ, 22 հունիսի, ԱՐՑԱԽՊՐԵՍ։  «Արցախպրես»-ի թղթակցի հաղորդմամբ` հուլիսի 10-23-ը Ստեփանակերտում՝ Hub Artsakh-ում, կգործի պատկերապատումների (կոմիքսների) անվճար ամառային դպրոց, որի ընթացքում պրոֆեսիոնալ նկարիչները դասախոսությունների, վարպետության դասերի և գործնական պարապմունքների միջոցով պատանիներին կծանոթացնեն պատկերապատումների արվեստին և կօգնեն ստեղծել իրենց սեփական կոմիքսները: Երկշաբաթյա անվճար դպրոցին կարող են մասնակցել 16 տարեկանից բարձր բոլոր արցախցիները՝ անկախ նկարչական հմտություններից։

Մեզ հետ զրույցում ասել է Genesis Armenia ուղեղային կենտրոնի փիառ պատասխանատու Գառնի Մութաֆյանը.

 

«Կոմիքսները պատկերների և տեքստի միջոցով ստեղծվող պատմություններն են։ Ծրագրի նպատակն է արցախցի երիտասարդներին սովորեցնել պատկերների լեզուն, որի շնորհիվ հնարավորություն կունենան նաև այդ ժանրով աշխարհին ցույց տալ ապրող Արցախը»,-ասել  է Գ. Մութաֆյանը, և ավելացրել, որ «Արցախն ապրում է» խորագրով պատկերապատումների վարպետության դասերի ընթացքում մասնակիցները կուսումնասիրեն նաև մուլտֆիլմի տեսակները, կծանոթանան կոմիքսների ստեղծման փուլերին, իսկ դասընթացի ավարտին մասնագետների օգնությամբ կստեղծեն իրենց սեփական կոմիքսները։ Բոլոր աշխատանքները կհրատարակվեն կոմիքսների նոր ժողովածուում։

 

Ի դեպ, «Ինքնահռչակ նկարիչ» դպրոցն Արցախում գործելու է արդեն 2-րդ անգամ։ Կոմիքսների նոր ժողովածուում տեղ են գտել նաև Արցախի երիտասարդների նախորդ տարվա աշխատանքները։

 

Գրանցվելու համար հետևե՛ք այստեղ