Ստեփանակերտի Վերածննդի հրապարակում այսօր՝ սեպտեմբերի 15-ի առավոտյան վերսկսված ինքնաբուխ հանրահավաքը շարունակվել է նաև երեկոյան:
Ստեփանակերտում հանրահավաքը շարունակվել է նաև օրվա երկրորդ կեսին
ՍՏԵՓԱՆԱԿԵՐՏ, 15 սեպտեմբերի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ` հանրահավաքի մասնակիցներն ու ելույթ ունեցողներն իրենց մտահոգությունն են արտահայտել Արցախի ճակատագրի և կարգավիճակին վերաբերող խնդիրների վերաբերյալ:
Հանրահավաքի ընթացքում Արցախի Հանրապետության Ազգային ժողովի նախագահ Արթուր Թովմասյանը ներկայացրել է տեղակատվություն Երևանում Հանրապետության նախագահ Արայիկ Հարությունյանի և Ազգային ժողովի ներկայացուցչական պատվիրակության հանդիպումների արդյունքի մասին:
«ԱՀ նախագահի մասնակցությամբ Երևանում կայացել է Անվտանգության խորհրդի ընդլայնված կազմով նիստ, որտեղ հստակ դրվել է պահանջ, որ Արցախն Ադրբեջանի կազմում չի եղել և չի լինելու: Բարձրաձայնվել են բնակչությանը մտահոգող հարցերը: Մեզ հավաստիացրել են, որ Արցախի կարգավիճակի հարցով ոչ մի փաստաթուղթ չի քննարկվում»,- նշել է Ա. Թովմասյանը:
ԱՀ ԱԺ «Հայ Հեղափոխական Դաշնակցություն» խմբակցության քարտուղար Վահրամ Բալայանը կարևորել է միասնականությունը՝ խնդիրների լուծման և հաջողություններ կերտելու համար:
«Պատմության մեջ մեր բոլոր ունեցած հաջողությունները պայմանավորված են եղել միասնականությամբ: Հասարակության միասնությունը հնարավորություն է ստեղծում լուծել թե´ քաղաքական, թե´ տնտեսական խնդիրները: Ժամանակն է, որպեսզի հասարակության մեջ գոյություն ունեցող տարանջատումները, տարբեր մոտեցումները մի կողմ դրվեն և միասնական ճակատով կանգնենք պաշտպանելու երկրի սահմաններն ու մեր ժողովրդի իրավունքը»,-ընդծել է Վ. Բալայանը:
«Վաղվա Արցախ» կուսակցության նախագահ Տիգրան Պետրոսյանի խոսքով՝ հանրահավաքի համար պատճառ են հանդիսացել վերջին զարգացումները:
«Պետք է պայքարենք Արցախի հայկական լինելու համար»,-հավելել է նա:
