Արցախի Հանրապետությունում այս տարի խաղողի բերքատվության ցուցանիշները նախորդ տարվա համեմատ շատ ավելի գոհացուցիչ են՝ չնայած տեղացած կարկուտին, որը զգալի վնաս է հասցրել:
Հանրապետությունում խաղողի բերքատվության այս տարվա ցուցանիշները գոհացուցիչ են. Փոխնախարար
ՍՏԵՓԱՆԱԿԵՐՏ, 17 հոկտեմբեր, ԱՐՑԱԽՊՐԵՍ։Այս մասին «Արցախպրես»-ի թղթակցի հետ զրույցում ասել է ԱՀ գյուղատնտեսության նախարարի տեղակալ Վիլեն ԱՎետիսյանը:
«Նախորդ տարվա համեմատ ավելացել է համախառն արտադրանքի ցուցանիշը»,-հավելել է Վ.Ավետիսյանը: Նրա տեղեկացմամբ՝ ընթացիկ տարվա խաղողի սեղանի սորտերի բերքահավաքի աշխատանքները մեկնարկել են օգոստոս ամսվա կեսերից, իսկ տեխնիկական սորտերինը՝ սեպտեմբերի կեսերից: Բերքահավաքը մեկնարկել է Մարտունու և Մարտակերտի շրջաններում, այնուհետև նաև Ասկերանի շրջանում:
«Խաղողի բերքի մթերումն ու վերամշակումն իրականացնում են տեղական վերամշակող կազմակերպությունները, որոնք խաղողն ընդունում են՝ ըստ քաղցրության աստիճանի, որը պետք է լինի 20 տոկոսից ոչ պակաս: Որոշակի քանակությամբ էլ, խաղողն արտահանվում է Հայաստանի Հանրապետություն, որտեղ մթերում են գինիներ պատրաստելու նպատակով»,-մանրամասնել է Վիլեն Ավետիսյանը:
Անդրադառնալով նռան բերքահավաքին՝ Վիլեն Ավետիսյանը տեղեկացրել է,որ Հանրապետությունում այն մեծ ծավալով դեռևս չի մեկնարկել, քանի որ բերքն ամբողջությամբ դեռ չի հասունացել: Առանձին այգիներում, սակայն, որոշ հողօգտագործողներ արդեն սկսել են նռան բերքահավաքը: