Հոկտեմբերի 17-ին հրավիրվել է Արցախի Հանրապետության Ազգային ժողովի ֆինանսաբյուջետային և տնտեսական կառավարման հարցերի մշտական հանձնաժողովի նիստ:
Սոցիալական որոշ խմբերի ժամանակավոր բնակապահովման աջակցությամբ պայմանավորված պետբյուջեում ավելացումներ կկատարվեն
ՍՏԵՓԱՆԱԿԵՐՏ, 18 հոկտեմբեր, ԱՐՑԱԽՊՐԵՍ։ Օրակարգում ««Շահութահարկի մասին» օրենքում փոփոխություն կատարելու մասին» և ««Արցախի Հանրապետության 2022 թվականի պետական բյուջեի մասին» օրենքում փոփոխություններ և լրացումներ կատարելու մասին» օրենքների նախագծերի քննարկման հարցերն էին:
Այս մասին տեղեկացրել են ԱՀ Ազգային ժողովից:
««Շահութահարկի մասին» օրենքում փոփոխություն կատարելու մասին» օրինագիծը ներկայացրել է ԱՀ տարածքային և ենթակառուցվածքների նախարար Հայկ Խանումյանը: Նախարարի փոխանցմամբ՝ օրինագծի ընդունումը հնարավորություն կտա շահութահարկ վճարողին՝ Արցախի ներդրումային հիմնադրամին փոխառությունների գծով հաշվետու տարվա ընթացքում հաշվարկվող տոկոսների գումարները նվազեցնել իր համախառն եկամտից:
Օրակարգի երկրորդ հարցը ««Արցախի Հանրապետության 2022 թվականի պետական բյուջեի մասին» օրենքում փոփոխություններ և լրացումներ կատարելու մասին» օրենքի նախագծի քննարկումն էր:
Նախագծով առաջարկվում է ԱՀ 2022թ պետական բյուջեի սեփական եկամուտներն ավելացնել 5,000.0 մլն դրամով ՝ պայմանավորված որոշ հարկ վճարողների հարկման բազայի ճշգրտմամբ,ինչպես նաև պատերազմական գործողությունների հետևանքով տեղահանված և (կամ) բնակտարածք կորցրած անձանց բնակարանային կարիքի ժամանակավոր բավարարման նպատակով դրամական աջակցության տրամադրմամբ: Նախագծերը դրական եզրակացությամբ կներկայացվեն ԱՀ ԱԺ հերթական նիստի քննարկմանը:
