Արցախյան հիմնախնդրի շուրջ վերջին ամիսների զարգացումները, բանակցային գործընթացը, դրանցում առկա դիրքորոշումները որոշակի մտահոգություններ են առաջացրել, քանի որ դրանցում չի արտացոլվում և հաշվի չի առնվում ազգերի ինքնորոշման իրավունքը:
Հնարավոր չէ ճնշելով և այլ մեխանիզմներով մեզ պարտադրել հրաժարվելու ինքնորոշման իրավունքից. ԱՀ ԱԺ «Ազատ Հայրենիք-ՔՄԴ» խմբակցության ղեկավար
ՍՏԵՓԱՆԱԿԵՐՏ, 30 հոկտեմբեր, ԱՐՑԱԽՊՐԵՍ: Այս մասին մեզ հետ զրույցում ասաց Արցախի Հանրապետության Ազգային ժողովի «Ազատ Հայրենիք-ՔՄԴ» խմբակցության ղեկավար Արթուր Հարությունյանը:
«Մենք տարբեր հարթակներում բազմիցս շեշտել ենք, որ 1991 թվականին Արցախի Հանրապետության Անկախության հռչակագրով և դեկտեմբերի 10-ի հանրաքվեով, ինքնորոշվելու և անկախ պետություն ունենալու մեր կամքն ենք արտահայտել: Արդյունքում ունեցանք մեզ պարտադրված երեք պատերազմները, անդառնալի մարդկային ու տարածքային կորուստներ:Չի կարելի ճնշելով կամ տարբեր մեխանիզմներ կիրառելով, մեզ պարտադրել հրաժարվել ինքնորոշման իրավունքից: Մենք չենք պատրաստվում այդ իրավունքը որևէ կերպ զիջել. սա է մեր հիմնական ուղերձը, որ փորձում ենք ներկայացնել միջազգային հանրությանը, բոլոր դերակատարներին, ԵԱՀԿ Մինսկի խմբի համանախագահ երկրներին, որպեսզի բոլորն էլ հասկանան, որ Արցախի Հանրապետության քաղաքացիները պայքարելու են մինչև վերջ իրենց պատմական հայրենիքում ապրելու, արարելու իրենց իրավունքը իրացնելու համար»,-նշեց Արթուր Հարությունյանը՝ ընդգծելով,որ Արցախի Հանրապետության Ազգային ժողովի հոկտեմբերի 30-ի արտահերթ նիստն ու Ստեփանակերտի Վերածննդի հրապարակում տեղի ունեցող հանրահավաքը նպատակ ունի ներկայացնել դիրքորոշումը, որ անընդունելի են այն բոլոր տարբերակները, որոնք կասկածի տակ են դնում Արցախի Հանրապետության ինքնիշխանությունն ու Արցախի ժողովրդի ինքնորոշման իրավունքը:
«Ցանկացած առաջարկ, փաստաթուղթ, որը չի բխում այս տրամաբանությունից մեզ համար անընդունելի է: Մենք միշտ էլ կողմնակից ենք եղել բանակցային, խաղաղ ճանապարհով հարցի կարգավորմանը: Այս պահին տեղի են ունենում որոշակի զարգացումներ, որոնք մեր ընկալմամբ որոշ շահերի բախման արդյունքում են ձևավորվում, հաշվի չեն առնվում միջազգային իրավանորմերը, իսկ միջազգային հանրությունը երկակի ստանդարտներով է առաջնորդվում: Բազմաթիվ անգամ Կոսովոյի օրինակն ենք ներկայացրել , որն ինքնորոշվել է և առանձին պետություն ստեղծելու իր կամքն է արտահայտել. մի դեպքում դա ընդունվում է միջազգային հանրության կողմից, իսկ մյուս կողմից՝ մեր դեպքում, չի ընդունվում: Մենք փորձում ենք մեր ձայնը լսելի դարձնել բոլորի համար. չի կարող այնպես լինել, որ աշխարհի մի մասում ապրող մարդիկ, ժողովուրդները ունենան ազգերի ինքնորոշման իրավունք, մյուս մասը՝ ոչ: Պատմության ընթացքում Արցախը երբեք անկախ Ադրբեջանի կազմում չի եղել: Հիմք ընդունել և առաջնորդվել այն հանգամանքով, որ 20-րդ դարի 20-ական թվականներին Խորհրդային Միության տարիներին Արցախը՝ որպես ինքնավար մարզ, բռնակցվել է Ադրբեջանին, անհեթեթություն է: ԽՍՀՄ օրենսդրության համաձայն՝ բոլոր առանձին միավորները իրավունք ունեին հանրաքվե անցկացնելուց հետո ստեղծել առանձին պետություն:
Մենք մեր անկախության ու պետականության հռչակման ամբողջ գործընթացն իրականացրել ենք բոլոր իրավանորմերի համաձայն: Արտահերթ նիստի արդյունքում ընդունվող հայտարարությունը և նաև հանրահավաքում հնչող մտքերը, տեսակետները լինելու են այս ամենի շուրջ, որ մեզ համար անընդունելի է Արցախը Ադրբեջանին բռնակցելը»,- ասաց Ա. Հարությունյանը:
Նրա խոսքով Ռուսաստանի Դաշնության կողմից ներկայացված առաջարկը , ըստ որի՝ Լեռնային Ղարաբաղի հակամարտությունը ենթակա է կարգավորման բանակցային գործընթացով, ոչ թե ուժի կիրառմամբ, հնարավորություն է տալիս շարունակել պայքարը:
«Այն մեզ հիմք է տալիս, որպեսզի շարունակենք մեր դիրքորոշումը ներկայացնել մնացած բոլոր դերակատարներին, միջազգային հանրությանը, ԵԱՀԿ Մինսկի խմբի համանախագահությանը»,-եզրափակեց Արցախի Հանրապետության ԱԺ «Ազատ Հայրենիք-ՔՄԴ» խմբակցության ղեկավարը:
