Արցախի Հանրապետությունում արդյունաբերության ոլորտում արձանագրված հիմնական ցուցանիշները նախորդ տարվա համեմատ դրական են:
Արցախում արդյունաբերության հիմնական ցուցանիշները նախորդ տարվա համեմատ դրական են. ԱՎԾ նախագահ
ՍՏԵՓԱՆԱԿԵՐՏ, 11 նոյեմբեր, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ այս մասին այսօր նոյեմբերի 11-ին, ասել է Արցախի Հանրապետության Ազգային վիճակագրական ծառայության նախագահ Մանուշ Մինասյանը՝ ներկայացնելով Հանրապետությունում սոցիալ-տնտեսական վիճակը 2022 թվականի հունվար-սեպտեմբերին:
«Թողարկվել է շուրջ 78,3 միլիարդ դրամի արդյունաբերական արտադրանք: Պատրաստի արտադրանքի իրացումը տեղում և Հանրապետությունից դուրս կազմել է 72,1 միլիարդ դրամ: Արդյունաբերական արտադրանքի ֆիզիկական ծավալի ինդեքսը 2021 թվականի հունվար-սեպտեմբեր ամիսների համեմատ կազմել է 146.4 տոկոս, որն ապահովվել է արդյունաբերության հիմնական հատվածներում արձանագրված ցուցանիշների աճի հաշվին: Մասնավորապես՝ հանքագործության և բացահանքերի շահագործման ոլորտում արդյունաբերական արտադրանքի ֆիզիկական ծավալի ինդեքսը կազմել է 196,2 տոկոս: Մշակող արդյունաբերությունում անկում է գրանցվել, որը կազմել է 86.2 տոկոս: Ցուցանիշներն աճել են էներգետիկայի ոլորտում՝ 116.7 տոկոս, ջրամատակարարման,կոյուղու,թափոնների հեռացման՝ 100.4 տոկոս»,-մանրամասնել է Մ. Մինասյանը:
Նրա խոսքով՝ ընդհանուր առմամբ այս տարվա 9 ամսվա կտրվածքով արդյունաբերական արտադրանքի կառուցվածքն էական փոփոխություններ չի կրել. ինչպես նախկինում՝ գերակշռել է հանքագործության մասնաբաժինը:
«Արդյունաբերական արտադրանքի 59,4 տոկոսը բաժին է ընկել հանքագործությանը և բացահանքերի շահագործման ոլորտին, 20,3 տոկոսը մշակող արդյունաբերությանը, իսկ 19,7 տոկոսը էներգետիկային, իսկ 0.6 տոկոսը կազմել է ջրամատակարարման, կոյուղու,թափոնների կառավարման և վերամշակման ոլորտի մասնաբաժինը»,-հավելել է Մ.Մինասյանը՝ նշելով, որ արդյունաբերական արտադրանքի ծավալում 61,1 տոկոսը բաժին է ընկել Մարտակերտին, 29 տոկոսը Ստեփանակերտին, մնացած մոտ 10 տոկոսը մյուս երեք շրջանների միջև է բաշխվել:
