Արցախի Հանրապետությունն ակնկալում է հակամարտության կարգավորման համակողմանի մոտեցումներ:
«Արցախի Հանրապետությունն ակնկալում է հակամարտության կարգավորման համակողմանի մոտեցումներ». Նելլի Բաղդասարյան
ՍՏԵՓԱՆԱԿԵՐՏ, 2 դեկտեմբերի, ԱՐՑԱԽՊՐԵՍ: «ՌԴ-ն առանձնահատուկ նշանակության միջնորդ է, հաշվի առնելով նրա դերակատարությունը ադրբեջանա-ղարաբաղյան հակամարտության ռազմաքաղաքական գործընթացներում: Հաշվի առնելով ՌԴ տեղեկացվածությունը և գործուն մասնակցությունը կարգավորման գործընթացներին՝ Արցախի Հանրապետությունը ակնկալում է հակամարտության կարգավորման համակողմանի լուծումներ»,- Aravot.am-ի հետ զրույցում ասաել է ԱՀ նախագահի միջազգային հարաբերությունների հարցերով խորհրդական Նելլի Բաղդասարյանն՝ անդրադառնալով ՌԴ նախագահ Սերգեյ Լավրովի երեկ արած հայտարարություններին:
«Այդ լուծումներում պետք է հաշվի առնել, որ անընդունելի է միջնորդություն ստանձնած պետությունների կողմից արված որևէ առաջարկ, որն Արցախի Հանրապետությունը Ադրբեջանի Սահմանադրության շրջանակներում ինտեգրելու հետևանք կարող է ունենալ»,- ասել է Նելլի Բաղդասարյանը՝ հիշեցնելով, որ Արցախի Հանրապետությունը բազմիցս հայտարարել է, որ կարգավիճակի հետ կապված լուծումները երբևէ չպետք է տանեն Արցախի Հանրապետությունը Ադրբեջանի կազմում դիտարկելու ձևաչափ: Նման զարգացումները կարգավիճակի հարցում գոյաբանական աղետ են կանխորոշում Արցախի ժողովրդի համար:
«Բավական է հետևել ՌԴ խաղաղապահ առաքելության տեղեկագրերին, հասկանալու, որ անգամ արտաքին անվտանգային երաշխիքների պայմաններում Ադրբեջանը շարունակում է սպառնալ Արցախի ժողովրդի գոյությանը։ Այս իրողություններում ինքնանպատակ չէ ԱՀ կողմից պարբերաբար բարձրացվող անվտանգային առանցքային հարցը՝ ՌԴ խաղաղապահության ներկայության ժամկետի երկարաձգման կենսական անհրաժեշտությունը: Ինչ վերաբերում է մարդու իրավունքներին, ապա Արցախի Հանրապետության դեպքում դա ժողովրդի հավաքական կամքն արտահայտելու իրավունքն է, որի կիրառմամբ նա ինքնորոշվել է, ինստիտուցիոնալ առումով կայացել որպես ժողովրդավարական պետություն, պայքարել և շարունակում է պայքարել միջազգային ճանաչման համար։ Մենք ակնկալում ենք, որ միջնորդություն իրականացնող պետությունները համակողմանի մոտեցումներ և լուծումներ կառաջադրեն հակամարտության կարգավորման համար, որտեղ հաշվի կառնվի Արցախի Հանրապետության 150000 ժողովրդի կամքը»,- ասել է նա:
