Այսօր` հունվարի 6-ին, Ստեփանակերտի Աստվածամոր Սուրբ Հովանի մայր տաճարում Հայ առաքելական եկեղեցու Արցախի թեմի առաջնորդ Տեր Վրթանես եպիսկոպոս Աբրահամյանի հանդիսապետությամբ մատուցվել է Սուրբ Ծննդյան պատարագ:
Ստեփանակերտի Մայր տաճարում Սուրբ Ծննդյան պատարագ է մատուցվել
ՍՏԵՓԱՆԱԿԵՐՏ, 6 հունվարի, ԱՐՑԱԽՊՐԵՍ։ «Արցախպրես»-ի թղթակցի հաղորդմամբ` Սուրբ Ծննդյան պատարագից անմիջապես հետո կատարվել է Ջրօրհնեքի կարգ, որը Քրիստոսի մկրտության խորհուրդն ունի։
Խաչքավոր է կարգվել Արցախի Հանրապետության քաղաքաշինության նախարարի պաշտոնակատար Արամ Սարգսյանը։
Մեզ հետ զրույցում Տեր Վրթանես եպիակոպոս Աբրահամյանն ասել է, որ Սուրբ Ծննդյան պատարագից հետո տեղի է ունենում Մկրտության, այսինքն՝ Աստվածահայտնության տոնը, որին մասնակցում են աշխարհիկներ՝ ի դեմա խաչքավորի, ով դառնում է եկեղեցու տարվա քավորը։
Անդրադառնալով օրվա խորհրդին՝ Սրբազանն ասել է, որ Աստված այնքան է սիրում մարդկանց, որ նույնիսկ իր Միածին Որդուն ուղարկեց,որպեսզի Նրան հավատալու շնորհիվ մարդկանց մեջ տիրի սեր և հաճություն, երկրի վրա՝ խաղաղություն։
«Հենց սա է Աստծո համար ամենացանկալի փառաբանությունը։ Այսօր ազգային մեր կյանքում տեղ գտած փորձությունների և Արցախի արհեստական մեկուսացման պայմաններում մեր ականջներին քաղցր է հնչում Սուրբ Ծննդյան խաղաղության ավետիսը։ Բայց և փոթորկվում է բոլորիս միտքն ու հոգին։ Քրիստոսով Աստված բացեց մեզ համար երկնքի արքայության ճանապարհը և հրավիրեց բոլորին ազատորեն քայլելու այդ ճանապարհով։Սա նշանակում է, որ Աստված մեզ տվեց խաղաղության համար բոլոր գործիքները,ցույց տվեց դրանց կիրառության եղանակներն ու արդյունքը,և մշտապես սպասում է մեր պատասխան քայլերին»,-ասել է Տեր Վրթանես եպիսկոպոս Աբրահամյանը։ 
Թեմակալ առաջնորդի խոսքով՝ Շհաճախ իր ընտրած ճանապարհին հավատարիմ մնալու համար հայ ազգը Փրկչի նման հանձն է առել փառքի պսակների փոխարեն փշե պսակներ կրել իր գլխին, որովհետև հավատացել է նաև հարությանը:
«Բայց շատ հաճախ էլ հենց այդ ճանապարհից շեղումը առիթ է դարձել կորուստների ու պարտությունների, որովհետև ում շատ է տրված նրանից շատ է պահանջվում: Այսօր կարծես թե երկու իրականությունն էլ առկա է Արցախում: Մենք, մեր ոչ քրիստոնեական ապրելակերպի արդյունքում, ունեցանք պարտություն և կորուստ և վճարեցինք մեր սխալների համար: Այսօր տառապած մեր երկրում տիրում է միասնություն և համերաշխության մթնոլորտ և այստեղից հնչում է արդարության ձայնը, բայց մարդկությունը խլացնում է իր ականջները՝ չլսելու այդ ձայնը, ինչպես չլսեց Քրիստոսի արդարության քարոզը: Եվ այս վիճակում մեր ականջներին կրկին հնչում է Հիսուս Քրիստոսի կենարար ձայնը. «Քաջալերվեցեք, որովհետև ես հաղթեցի աշխարհին»: Քրիստոսի խոսքերը երաշխիքն են մեր արդար պայքարի ու համբերության՝ որ այսօր, այս դժվար օրերը առավել միասնական են դարձրել մեզ բոլորիս: Արցախի ապագան այսօր նորից դարձել է հայի արժանապատվության հերթական քննությունը և որպեսզի այդ քննությունը ստանա պատվաբեր գնահատական, պետք է ազգովի սթափվենք ու զգաստանանք: Նայելով այսօրվա տիրող անտարբերության ու թմրության մթնոլորտին, երբ մեր ազգի մի մասը քնի մեջ սուզված, լուսնոտի նման գնում է դեպի անդունդ ու ոչինչ չի տեսնում և չի զգում, Արցախը և մեզանից յուրաքանչյուրը պիտի դառնա մեր ազգի հոգու և խղճի զարթուցիչը: Մեր ազգը հոգևոր ազգ է և մեր ուժը հենց դրա մեջ է: Հոգևորից դուրս մենք թուլանում ենք ու տկարանում; Սա աստվածատուր շնորհ է և սրանով ենք մենք տարբերվում ուրիշներից: Օգտագործելով այդ շնորհը մենք լուսավորվում ենք, վերափոխվում և դառնում անխոցելի ու անպարտելի: Սրանք ուղղակի գեղեցիկ խոսքեր չեն, այլ մեր նախնիների կողմից ապրված ճշմարտություններ: Եվ, եթե այսօր մենք աղոթքով միանանք մեր սրբազան նախնիների, մեր նահատակ քաջորդիների հետ, ապա կլսենք նաև նրանց ձայնը, որ մեզ ասում է. «Քաջալերվեցեք, որովհետև մենք հաղթեցինք աշխարհին և մի դադարեք պայքարել ու արդարության ձայնը հնչեցնել»: Սուրբ գրքի հրաշքը կայանում է նրանում, որ այն միշտ ներկա ժամանակով է գործում: Այսօր էլ նրա բազմաթիվ պատգամներ կարծես Արցախի համար են եղած, գրված: Երբ այսօր մեզ մտահոգում է նաև պարենային անվտանգության խնդիրը, մեր ականջներին հնչում է ավետարանական այն խոսքը՝ թե միայն հացով չէ, որ մարդ կապրի, այլ ամեն մի խոսքով, որ դուրս է գալիս Աստծո բերանից: Սա նշանակում է, որ մենք չպետք է տրտմենք սննդի որոշ տեսակների բացակայության պատճառով, այլ որոշ ժամանակ բավարարվենք եղածով հանուն արդարության և ճշմարտության հաղթանակի»,-ասել է ՀԱԵ Արցախի թեմի առաջնորդը՝ հիշեցնելով նաև, թե ինչպես Իսրայելի ժողովուրդն անապատում քառասուն տարի միատեսակ սնունդ էր օգտագործում:
«Ինչպես 2023 տարիներ առաջ Բեթղեհեմի երկնքում փայլող աստղը աշխարհի երեք իմաստուն թագավորների ուղեկցեց դեպի մի աննշան քարայրի մեջ ծնված Հիսուսի մոտ՝ երկրպագելու և արեգակի արդարության ձայնը վկա լինելու, նույն կերպ Սուրբծննդյան այս օրը այդ աստղը ծագում է աշխարհից մերժված ու մոռացված Արցախ անունով մսուրի վրա: Եվ հրավիրում է աշխարհի հզորներին լսելու այստեղ շարունակ ծնվող արդարության ձայնը: Բեթղեհեմյան մսուրի մեջ ծնված Մանուկն այս օրերին գալիս է մեզ ևս մեկ անգամ հիշեցնելու, որ ճշմարտության և արդարության ձայնը հնարավոր չէ խլացնել և անգամ մի աննշան քարայրում ծնվելով այն կարող է ազդել և փոխել ամբողջ աշխարհը»,-հավելել է Տեր Վրթանես եպիսկոպոս Աբրահամյանը:
Սուրբ Ծննդյան պատարագին ներկա էին նաև Արցախի Հանրապետության նախագահ Արայիկ Հարությունյանը, ԱՀ երկրորդ և երրորդ նախագահները, պետական նախարար Ռուբեն Վարդանյանը, պաշտոնատար այլ անձինք:
