Թուրքիայի ազգային պաշտպանության նախարար Հուլուսի Աքարը եռակողմ հանդիպում է ունեցել Ադրբեջանի պաշտպանության նախարար գեներալ Զաքիր Հասանովի և Վրաստանի պաշտպանության նախարար Ջուանշեր Բուրչուլաձեի հետ, հայտնում է Անադոլու գործակալությունը։
Թուրքիայի, Վրաստանի և Ադրբեջանի պաշտպանության նախարարները կհետևեն Կարսում ընթացող ձմեռային զորավարժություններին
ՍՏԵՓԱՆԱԿԵՐՏ, 2 փետրվարի, ԱՐՑԱԽՊՐԵՍ: Աքարը՝ գլխավոր շտաբի պետ, գեներալ Յաշար Գյուլերի, ցամաքային զորքերի հրամանատար, գեներալ Մուսա Ավսեվերի, ռազմածովային ուժերի հրամանատար, ծովակալ Էրկումենտ Թաթլիօղլուի և ռազմաօդային ուժերի հրամանատար, գեներալ Աթիլլա Գյուլանի ուղեկցությամբ ժամանել է Կարս՝ հետևելու 2023 թվականի ձմեռային զորավարժությունների դիտորդների օրվա աշխատանքներին, որը նախատեսված է այսօր, գրում է Armenia Today-ը։
Աղբյուրը հայտնում է, որ նախարարները Սարիղամիշում եռակողմ հանդիպում են անցկացրել։
Հանդիպմանը մասնակցել են Թուրքիայի զինված ուժերի հրամանատարության ներկայացուցիչներ։ Հանդիպման ընթացքում մտքերի փոխանակություն է տեղի ունեցել ռազմական պատրաստության և համագործակցության հարցերի շուրջ։ Նախարարներ Աքարը, Հասանովը և Բուրչուլաձեն փետրվարի 2-ին կհետևեն 2023 թվականի ձմեռային զորավարժությունների ընթացքին։
Ավելի վաղ հայտնել էինք, որ Թուրքիայի արևելքում գտնվող Կարս նահանգում շարունակվում են Թուրքիայի պատմության մեջ ամենախոշոր ձմեռային զորավարժությունները։
