ՍՏԵՓԱՆԱԿԵՐՏ, 29 մարտի, ԱՐՑԱԽՊՐԵՍ: Այս մասին «Արցախպրես»-ի թղթակցի հետ զրույցում ասել է մտահղացման հեղինակ, համայնքի դպրոցի անգլերենի ուսուցչուհի Աննա Արսենյանը:

 

«Արդեն երկրորդ տարին է, ինչ աշխատում և ապրում եմ Կաղարծի գյուղում։ Ինքս ծննդով Սյունիքից եմ, Կապանից։ Առաջին իսկ օրից, երբ սկսեցի աշխատել այստեղ, նկատեցի, որ աշակերտներս մեծ հետաքրքրություն ունեն ընթերցանության նկատմամբ։ Դպրոցի գրադարանում չնայած կան գրքեր, բայց  դրանք հին են, եւ մի փոքր դժվար է նման պայմաններում աշակերտներին մոտիվացնել, որպեսզի ավելի շատ կարդան: Օգտվում  էինք օնլայն գրքերից, սակայն ընթերցածը լիարժեք քննարկելու համար համապատասխան տեղ չունեինք։ Ակումբ ունենալու գաղափարը հենց սկզբից էլ ունեի, սակայն շատ խոչնդոտներ կային այն իրականություն դարձնելու համար։Շրջափակման ընթացքում հասկացա, որ  ակումբ ունենալն ավելի քան անհրաժեշտ է. միասին մի լավ ու արժեքավոր բան ստեղծելն ավելի կհամախմբի աշակերտներին ու համայնքի բնակիչներին, հատկապես երիտասարդներին, որ ազատ ժամանակ չգիտեն ինչով զբաղվել»,-պատմել է Ա. Արսենյանը՝ հավելելով, որ անվանումն արդեն իսկ խոսում է ակումբի կարևորության ու գաղափարի մասին։

 

Մեր զրուցակիցը նշել է, որ մտահղացումը կյանքի կոչելու համար դրամահավաք է կազմակերպվել. աջակցել են իր ընկերները, բարեկամները, գործընկերները, Կապանի համադասարանցիները: Եղած միջոցներով փոքր- ինչ վերանորոգում են համայնքի  ակումբը:

 

«Այն գտնվում է գյուղապետարանի շենքի 2-րդ հարկում։ Դպրոցի տնօրենի միջամտությամբ, համայնքապետը սիրով երկու սենյակ տրամադրեց, որից մեկը կլինի ընթերցասրահ եւ գրադարան, որտեղ  կկազմակերպվեն գրքերի քննարկումներ, իսկ մյուսը նախատեսված է  որպես  ժամանցային սենյակ ինտելեկտուալ խաղ-վիկտորինաների համար: Կհրավիրենք այլ համայնքներից աշակերտների, կունենանք նաև աշխատարաններ տարբեր թեմաներով։ Արդեն նոր ու հետաքրքիր գրքեր կարողացել ենք ձեռք բերել, սակայն  նորերը  ստանալը շատ ցանկալի է»,-ընդհանրացրել է Ա. Արսենյանը։