Այսօր՝ ապրիլի 7-ին, Ստեփանակերտի Սուրբ Աստվածածին առաջնորդանիստ եկեղեցում՝ ՀԱՍԵ Արցախի թեմի առաջնորդ Տեր Վրթանես եպիսկոպոս Աբրահամյանի հանդիսապետությամբ կատարվել է Հիսուս Քրիստոսի Խաչելության հիշատակման կարգ :
Ստեփանակերտի Սուրբ Աստվածածին առաջնորդանիստ եկեղեցում կատարվել է Խաչելության հիշատակման կարգ
ՍՏԵՓԱՆԱԿԵՐՏ 7 ապրիլի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ ընթերցվել են չորս Ավետարաններից այն բոլոր հատվածները, որտեղ նկարագրվում է Քրիստոսի դատավարությունը, Նրա անարգվելը և խաչելության դրվագը։
Արցախի թեմի Քրիստոնեական դաստիարակության կենտրոնի տնօրեն Տեր Վաչագան քահանա Գյուրջանի խոսքով՝ ընթերցելով խաչելության հետ կապված այս բոլոր հատվածները և համապատասխան երգերով՝ մարդ ակամայից Քրիստոսի հետ կարծես անցնում է խաչի ճանապարհը՝ մատնությունից մինչև խաչելություն:
«Գողգոթայի ճանապարհով մենք Նրա հետ քայլում ենք և ամբողջ այդ էմոցիոնալ դաշտը զգում ենք մեզ վրա, որն ավելի է արժևորում Քրիստոսի զոհողությունը»,- ասում է Տեր Վաչագան քահանա Գյուրջյանը՝ հավելելով, որ այսօրվա ծեսի նպատակը մարդուն ցույց տալն է, թե ինչ է արել Քրիստոսն իր համար:
«Այսօրվան զուգադիպել են նաև նաև 4 տարի առաջ Ստեփանակերտի Սուրբ Աստվածածին եկեղեցու օծման և պաշտոնական բացման օրն ու Մայրության ու գեղեցկության տոնը»,-նշել է հոգևոր հայրը՝ ընդգծելով, որ, այնուամենայնիվ, Քրիստոսի խաչելության հիշատակի արարողությունն է, որ իր իմաստով ավելի մեծ նշանակություն ունի եկեղեցածիսական առումով:
«Այստեղ ամենակարևորը Մարիամ Աստվածածնի կերպարն է, ով նախ մայրության խորհրդանիշն է: Քրիստոսի չարչարանքների ժամանակ մենք ականատես ենք լինում Մարիամ Աստվածածնի ներկայությանը: Բոլոր առաքյալները լքում են Քրիստոսին, բայց Մարիամը մինչև վերջ մնում է ու տեսնում իր որդու տառապանքն ու մահը: Մարիամը չի կորցնում այն հավատը, որ իր հրեշտակի կողմից ավետված իր Որդին չէր կարող այսպես անփառունակ վախճանվել: Այդ սպասելիքը պետք է ունենան մեր բոլոր մայրերը, երբ ապրում են քրիստոնեական կյանքով, հատկապես մեր զոհվածների մայրերը, ովքեր զավակներին Քրիստոսի նման զոհաբերեցին, ինչպես Մարիամը։ Նրանք պետք է սպասեն, որ մի օր էլ հարություն են առնելու իրենց զավակները, ինչպես Քրիստոս հարություն առավ»,-ասել է քահանան:
Խաչելության կարգի հիշատակության խորհուրդը ներկայացնելով, Թեմակալ առաջնորդ Տեր Վրթանես եպիսկոպոս Աբրահամյանը շեշտել է, որ ժամանակի քաղաքական գործիչները, իմաստունները, քահանայապետներն ամեն ինչ անում էին, որ Քրիստոսի բերած հոգևորը դարձնեն նյութական և աշխարհիկ։
«Խավարը միշտ պայքարում է լույսի դեմ։ Քրիստոսից առաջ և Քրիստոսից հետո դեռ խաչվում են մարդիկ, բայց այդ խաչյալները փրկիչ չեն, Խաչյալ Փրկիչը մեկն է, ով հարություն տվեց և այդ հարությունը դարձավ մեզ համար հավիտենական»,-եզրափակել է Սրբազանը: