«Վրաստանի հայ համայնք» ՀԿ նախագահ Արթուր Միրզոյանը Թբիլիսիում ենթարկվել է հարձակման:
«Վրաստանի հայ համայնք» ՀԿ նախագահ Արթուր Միրզոյանը Թբիլիսիում ենթարկվել է հարձակման, ըստ նրա՝ պատճառը ապրիլի 24-ի միջոցառումներն են
ՍՏԵՓԱՆԱԿԵՐՏ 22 ապրիլի, ԱՐՑԱԽՊՐԵՍ։ Այս մասին Միրզոյանը հայտնել է ֆեյսբուքյան իր էջում: Նրա խոսքով՝ երեկոյան, երբ գրասենյակից գնում էր տուն, իր վրա դիմակավորված 3 անձ է հարձակվել:
«Նրանցից մեկը սկզբում նկարահանում էր ինձ վիդեո տարբերակով, երկու հոգի մոտեցան՝ համոզվելու համար, որ ես Արթուրն եմ, այսինքն՝ ուշադիր նայում էին ինձ, դրանից հետո փորձեցի հեռանալ, բայց հարձակվեցին ինձ վրա: Գետնին ընկա, վիրավորում էինք միմյանց, էդ ընթացքում գլխիս ու մարմնիս էին հարվածում: Մի քանի տեղ ունեմ վնասվածք: Վերջին պահին կարողացա վեր կենալ ու պատասխան հարվածել իրենց, 3-րդ մարդը, որը վիդեո էր նկարում, մոտեցավ ու փորձեց օգնել մյուսներին, բայց վերջում, երբ շատ աղմուկ եղավ, փախան»,-ֆեյսբուքյան ուղիղ եթերի ժամանակ պատմեց Միրզոյանը:
Վերջինս դեպքից հետո զանգահարել է ոստիկանություն:
Արթուր Միրզոյանը վստահ է, որ կատարվածը կապ ունի ապրիլի 23-ի և 24-ի՝ Ցեղասպանության զոհերի հիշատակին նվիրված միջոցառումների հետ. «Փորձում են վախեցնելով խոչընդոտել մեր ձայնը: Կոչ եմ անում Թբիլիսիի հայությանը ապրիլի 24-ին կանգնեն ու իրենց արդար ձայնը բարձրացնեն»:
