Ադրբեջանի կողմից Արցախի շրջափակման առաջին օրվանից Ստեփանակերտի Հանրապետական բժշկական կենտրոնում դադարեցվել էին պլանային վիրահատությունները, որոնք արդեն մասնակիորեն վերսկսվել են:
Ի՞նչ առաջնահերթությամբ կիրականացվեն մասնակիորեն վերսկսված պլանային վիրահատությունները
ՍՏԵՓԱՆԱԿԵՐՏ 22 ապրիլի, ԱՐՑԱԽՊՐԵՍ։ «Արցախպրես»-ի թղթակցի հետ զրույցում Հանրապետական բժշկական կենտրոնի Անհետաձգելի բուժօգնության բաժանմունքի վարիչ, վիրաբույժ Գրիգորի Առստամյանը ասել է, որ շրջափակմամբ պայմանավորված, բժշկական ծառայություններն անցել են խիստ սահմանափակ ռեժիմի:
Նրա խոսքով՝ Հանրապետական բժշկական կենտրոնի տնօրինության, վիրաբուժական բաժանմունքի վարիչի միջնորդությամբ, պլանային վիրահատությունները վերսկսելու հարցը երկար է քննարկվել, հաշվի առնելով, որ ստեղծված իրավիճակում ցանկացած պահի կարող է մեծաքանակ բժշկական նյութատեխնիկական միջոցների անհրաժեշտություն առաջանալ:
Քննարկումների արդյունքում՝ Առողջապահության նախարարության թույլտվությամբ մասնակիորեն վերսկսել են հիվանդների ընդունելությունն ու պլանային վիրահատությունները:
Ըստ ՀԲԿ-ի Անհետաձգելի բուժօգնության բաժանմունքի վարիչի՝ պլանային վիրահատման համար հերթագրված հիվանդների որոշ խնդիրներ սպասելու ընթացքում բարդանում են, և ստիպված են նրանց շտապ կարգով վիրահատել, ուստի առաջնահերթություն է տրվելու նման դեպքերին:
ՀԲԿ ուրոլոգ, վիրաբույժ Մարատ Հարությունյանի խոսքով՝ պլանային վիրահատությունների համար այս ընթացքում մեծաթիվ հիվանդներ են հերթագրվել:
«Հիվանդ ունենք, որին երեկ ենք գրանցել, որպեսզի երկու ամսից հետո գա վիրահատվելու: Քթի միջնապատի խնդրով հիվանդներ կան, որոնք թթվածնաքաղց, գլխացավ են ունենում, ինչը խիստ ազդում է կյանքի որակի վրա: Իրենք նույնպես ստիպված են սպասել վիրահատվելու իրենց հերթին»,-ընդգծել է վիրաբույժը՝ հավելելով, որ կան այնպիսի հիվանդություններ որոնց դեպքերում, տեխնիկական որոշ միջոցների բացակայության պատճառով Արցախում հնարավոր չէ վիրահատություն կատարել, ուստի ստիպված են նման հիվանդներին ԿԽՄԿ-ի միջնորդությամբ ուղարկել ՀՀ մասնագիտացված բուժհաստատություններ՝ հետագա ռիսկերից և բարդացումներից խուսափելու համար, ինչի շնորհիվ այս ընթացքում բազմաթիվ կյանքեր են փրկվել:
