ԱրՊՀ-ում «Հայկական պատմամշակութային ժառանգությունը օկուպացված տարածքներում և մարտահրավերները» թեմայով քննարկում է կազմակերպվել
Այսօր՝ մայիսի 5-ին, Արցախի Հանրապետության Կրթության, գիտության, մշակույթի և երիտասարդության նախարարության երիտասարդության հարցերի բաժնի նախաձեռնությամբ ուսանողների և ավագ դպրոցների աշակերտների հետ կազմակերպվող շարունակական միջոցառումների շրջանակում Արցախի պետական համալսարանում տեղի է ունեցել քննարկում «Հայկական պատմամշակութային ժառանգությունը օկուպացված տարածքներում և մարտահրավերները» թեմայով:
ԱրՊՀ-ում «Հայկական պատմամշակութային ժառանգությունը օկուպացված տարածքներում և մարտահրավերները» թեմայով քննարկում է կազմակերպվել
ՍՏԵՓԱՆԱԿԵՐՏ, 5 մայիսի, ԱՐՑԱԽՊՐԵՍ: ԱՀ ԿԳՄՍ նախարարության երիտասարդության հարցերի բաժնի վարիչ Արևիկ Հովսեփյանի խոսքով՝ հանդիպում-քննարկումների մեկնարկած ծրագրի նպատակը երկրի առջև ծառացած և այդ հիմնախնդիրների վերաբերյալ Արցախի երիտասարդության տեսակտները լսելն է ու համատեղ քննարկումները դրանց լուծման վերաբերյալ:
ԱՀ ԿԳՄՍ նախարարի խորհրդական Մելանյա Բալայանն իր խոսքում կարևորել է գիտելիքներով զինված երիտասարդության դերը առկա մարտահրավերները հաղթահարելու գործում:
«Պատմական միջավայրի պահպանության պետական ծառայություն» ՊՈԱԿ-ի տնօրեն Արմինե Հայրապետյանն անդրադառնալով օկուպացված տարածքներում հայկական պատմամշակութային ժառանգության նկատմամբ Ադրբեջանի վարած քաղաքականությանը, նշել է, որ այդ երկիրը շարունակում է կոթողների ավերումն, պատմության խեղաթյուրման ու բռնայուրացման փորձերը:
«Այս ամենի կանխարգելման աշխատանքները ընթացքի մեջ են, սակայն դեռևս չկան լուծումներ»,- ասել է Ա. Հայրապետյանը:
Խոսելով Դադիվանքն «ուդիականացնելու» ադրբեջանական փորձերի մասին, բանախոսը նախ նշել է, որ վանական համալիրի պատերին հայերեն շուրջ 200 արձանագրություն կա:
«Դադիվանքի պատերին առկա են պատմության տարբեր ժամանակահատվածներն վերաբերող հայերեն արձանագրություններ, իսկ ուդիերեն մեկ բառ անգամ չկա: Ռուսաստանն ամենաբարձր մակարդակով նշել է, որ Դադիվանքն իր պահպանության և հովանավորության ներքո է և կարծում եմ հենց նրանք պետք է այս ամենը կանխարգելեն»,-ասել է «Պատմական միջավայրի պահպանության պետական ծառայություն» ՊՈԱԿ-ի տնօրենը։
Այնուհետև տեսասահիկի միջոցով ցուցադրվել են Ադրբեջանի կողմից օկուպացված տարածքներում գտնվող հայկական խաչքարերի, հուշարձանների և մշակութային ժառանգության ավերման տեսանյութեր, որին հաջորդել է ուսանողների հետ զրույց- քննարկումը օրվա թեմայի շուրջ: