Արցախի պետական համալսարանում նախօրեին կայացել է «Արցախի հոգեբանների միություն» մասնագիտական հասարակական կազմակերպության հիմնադիր ժողովը:
Կայացել է «Արցախի հոգեբանների միություն» ՀԿ-ի հիմնադիր ժողովը
ՍՏԵՓԱՆԱԿԵՐՏ, 25 մայիսի, ԱՐՑԱԽՊՐԵՍ: «Արցախպրես»-ի թղթակցի հաղորդմամբ՝ հիմնադիր ժողովի ընթացքում քննարկվել են հոգեկան առողջության պահպանման խնդիրները հետպատերազմյան շրջափակված Արցախում։
Ըստ օրակարգի՝ Արցախի հոգեբանների միության խորհրդի կազմի ընտրություն, ինչպես նաև հաստատվել է կանոնադրությունը: Մասնակիցների քվեարկությամբ Արցախի հոգեբանների միության նախագահ է ընտրվել Վիտյա Յարամիշյանը։ «Մեր երկրում աստիճանաբար թափ է առնում և արդեն որոշակի հաջողություններ ունի հոգեբանություն գիտությունը, հոգեբանական համայնքը։ 21-րդ դարը, ցավոք, այնպիսի մարտահրավերներ նետեց ու այնպիսի դժվարությունների առջև մեզ կանգնեցրեց, որ մենք չենք հասցնում անգամ իմաստավորել այն բոլոր սպառնալիքները, որոնց առնչվում ենք։ Համատեղ մեզ ավելի կհաջողվի դա իրականացնել՝ օգտագործելով մեր փորձառու և երիտասարդ ընկերներին»,-մեզ հետ զրույցում ասել է Վ. Յարամիշյանը։
Նա նշել է, որ միության նպատակն է ձևավորել մասնագիտական համայնք և համախմբելով առկա ներուժը՝ նպաստել երկրում առկա խնդիրների արդյունավետ լուծմանը՝ ցուցաբերելով մասնագիտական մոտեցում։ «Միությունը կունենա նաև կրթական գործառույթ՝ նպաստելով մասնագիտության կայացմանը»,-հավելել է նա։