ՍՏԵՓԱՆԱԿԵՐՏ, 30 մայիսի, ԱՐՑԱԽՊՐԵՍ: Այս մասին «Արցախպրես»-ի հետ զրույցում ասել է ռազմական փորձագետ Վլադիմիր Հարությունյանը՝ անդրադառնալով ադրբեջանական դիրքերից վերջին օրերին  ու  մասնավորապես մայիսի 30-ին շփման գծի հյուսիսային և արևելյան ուղղությամբ հրադադարի խախտումներին՝ ընդ որում   նաև  ականանետի  կիրառմամբ:

 

«Երբ արդեն հնչեց մեր արձագանքն ու  դիրքորոշումը, Ադրբեջանն, ըստ Ալիևի այն հայտարարության, որ «պատրաստ է ցանկացած տեսակի օպերացիաներ ծավալել այդ ուղղություններով»,  նկատի ունենալով Արցախի հատվածը, մկանների խաղ է ցուցադրում: Այսինքն փորձում է ցույց տալ, որ իրավիճակի տնօրինողն ինքն է և ցանկացած լուծում իր համար ընդունելի է՝ թե՛ ռազմական, թե դիվանագիտական»,-պարզաբանել է Վ. Հարությունյանը։

 

Անդրադառնալով այսօրվա դեպքի վերաբերյալ ադրբեջանական կողմի տարածած ապատեղեկատվությանը, ըստ որի` իբր  ԱՀ Պաշտպանության բանակն է եղել հրադադարի ռեժիմի խախտման նախաձեռնողը, ապա  ռազմական փորձագետն ընդգծում է, որ  առկա են կադրեր, որոնցում  ֆիքսված է  ադրբեջանական կողմից  ականանետեր կիրառելու ժամը։

 

«Իրենք տեսագրությունները և ինֆորմացիան տալիս են երեկոյան, ինչը,  բնականաբար, ժամային առումով չի համընկնում ընդհանուր իրավիճակի զարգացման դինամիկային։ Փաստացի հետին թվով փորձում են  կոծկել իրենց կողմից հրաձգությունը, որովհետև մեր և տեսագրության ժամով,  և հաղորդագրությունով երևում է, որ հրադադարի խախտումը կատարվում է հենց իրենց կողմից։  Իրենց կողմից հերքումը և հետագա անելիքների վերաբերյալ պաշտոնական տվյալներն  արդեն տարածվում են մեր արձագանքից հետո։ Բնականաբար դա փաստում է, որ խրոնոլոգիան իրենք պահում են և ժամանակ առ ժամանակ իրենց ապահովության համար ապատեղեկատվություն են  տալիս իրավիճակն իրենց իմաստով շտկելու առումով։ Բայց, եթե  այն, ինչ կատարվում է հիմա և հնարավոր զարգացումները համարժեք պատասխան չստանան, առանձնապես ռուս խաղաղապահների կողմից, որոնց պատասխանատվության գոտում է հիմնականում դա կատարվում, բնականաբար, փորձելու են ավելի լկտիաբար այն շարունակել իրենց առավել ուժն ու  վճռականությունն ընդգծված ցուցադրելու համար»,-համոզմունք է հայտնել ռազմական փորձագետը։

 

Հարցին՝ սպասել առաջիկայում նոր սադրանքների, թե ոչ՝ Վլադիմիր Հարությունյանը դրանք հավանական է համարել:

 

 «Տարբեր ուղղություններով շատ հավանական է լինեն նոր սադրանքներ՝ այս կամ այն ծավալներով։ Ականանետի կիրառումով, կարծում եմ, չեն սահմանափակվի: Արդեն կիրառվում է ծանր զինատեսակ, իսկ  միջին և ավելի մեծ տրամաչափի զինատեսակների կիրառման որոշումները, բնականաբար, շարքային մակարդակում չեն կայացնում։ Սա միակենտրոն ղեկավարվում է և տեղավորվում ընդհանուր համակարգի և համատեքստի ու  որպես ռազմական ապահովագրություն արված հայտարարությունների տրամաբանության  մեջ»,- եզրափակել է փորձագետը։