Մարտակերտի շրջանի Ճանկաթաղ գյուղի ուղղությամբ ադրբեջանական մարտական դիրքից, ինչպես ավելի վաղ հաղորդել էինք, հրաձգային զենքերից օրերս անկանոն կրակահերթեր էին արձակվել, որի հետեւանքով բնակելի տներ են վնասվել:
Թշնամին պարբերաբար խոչընդոտում է գյուղատնտեսական աշխատանքների կատարմանը. Կիչանի համայնքապետ
ՍՏԵՓԱՆԱԿԵՐՏ, 29 հունիսի, ԱՐՑԱԽՊՐԵՍ: Ադրբեջանական կողմի հերթական սադրանքից հետո բնակիչների տրամադրություններին հաղորդակից լինելու նպատակով այսօր՝ հունիսի 29-ին, «Արցախպրես»-ի թղթակիցն այցելել է Մարտակերտի շրջանի` հարևանությամբ գտնվող Ճանկաթաղ, Կիչան, և Նոր Ղազանչի համայնքներ:
«Հունիսի 27-ին՝ երեկոյան ժամը մոտավորապես 21:00-ի դրությամբ, կրակոցների ձայներ են լսվել: Թշնամու դիրքերից գյուղի ուղղությամբ կրակում էին հրետանային զինատեսակներից: Բնակիչների շրջանում, իհարկե, տագնապ ու վախ կար, բայց խուճապի չենք մատնվել: Բոլորս էլ քաջ գիտակցում ենք, որ մատաղ կյանքերը մեր հողի համար են դրվել զոհասեղանին»,- «Արցախպրես»-ի հետ զրույցում մանրամասնել է Կիչան համայքնի ղեկավար Արտո Հակոբյանը և ավելացրել, որ գյուղում շարունակում են ապրել ու արարել` խաղաղության հաստատման մասին հույսը չկորցնելով:Համայնքապետի խոսքով՝ գյուղի` մշակման ենթակա հողատարածքները բավականին մոտ են թշնամու մարտական դիրքերին, ինչի պատճառով 2022 թվականին աշնանացան մշակաբույսերի շատ փոքր ծավալի ցանքս են կատարել, այն էլ` միայն ռուս խաղաղապահների ներկայությամբ:
«Պատրաստվում ենք խոտհարքին, որից հետո նախատեսում ենք մեկնարկել գարնանացանի աշխատանքները: Բայց համոզված չենք, որ կստացվի, քանի որ թշնամին շատ է խանգարում գյուղատնտեսական աշխատանքների լիարժեք կատարմանը: Հողատարածք ունենք, որը ևս չենք կարողացել մշակել, տեղում առաջացած խոտն էլ ուզում ենք կենդանիների համար որպես կեր բերել, բայց դա ևս չի ստացվում: Մենք լավ ենք հասկանում, որ նրանց նպատակն է ամեն ինչ անել, որպեզի թողնենք ու հեռանանք այստեղից, բայց մենք չենք պատրաստվում թշնամուն ուրախացնել: Անձամբ զրուցել եմ համայնքի բոլոր բնակիչների հետ, բոլորն էլ հաստատակամ են իրենց տներում ապրելու»,- նշել է համայնքապետը:
Ա. Հակոբյանն իրազեկել է, որ գյուղացիները տնամերձ հողատարածքներում բանջարաբոստանային մշակաբույսերի ցանքս են կատարել: Որոշ մշակաբույսերի քաղն արդեն սկսել են: Առատ տեղումների պատճառով այս տարի գյուղում նաև մրգի պակաս է զգացվում:
Գյուղի բնակչուհի Ռուզաննա Հակոբյանը մեզ հետ զրույցում նշել է, որ պատրաստ են դիմակայել ցանկացած փորձության, միայն թե ի վերջո խաղաղություն լինի Արցախում։
«Թշնամու դիրքին մոտ գտնվող մեր հողամասը մնացել է անմշակ։ Բազմիցս խոչընդոտել են ցանքսի կատարմանը։ Շատ են կրակում թե՛ դեպի օդ, թե՛ գյուղի և թե՛ հատկապես դաշտում աշխատողների ուղղությամբ։ Բայց այլընտրանք չունենք, շարունակում ենք մեր բանջարանոցներում աշխատել, որպեսզի կարողանանք շրջափակման հարուցած պարենամթերքի խնդիրը ինչ-որ չափով հաղթահարել»,- պատմել է տիկին Ռուզաննան։Լուսանկարները՝ Դավիթ Ղահրամանյանի
