Այսօր՝ օգոստոսի 15-ին, Ստեփանակերտում բացվել է սոցիալական -բարեգործական ճաշարան:
Ստեփանակերտում սոցիալական-բարեգործական ճաշարան է բացվել
ՍՏԵՓԱՆԱԿԵՐՏ, 15 օգոստոսի, ԱՐՑԱԽՊՐԵՍ: Ծրագիրն իրականացվում է «Մենք ենք մեր սարերը» տարածքային զարգացման գործակալության միջոցով, «Արցախի անվտանգության զարգացման ճակատ» հանրային շարժման նախաձեռնությամբ:
«Իրականում Շարժումն ունի աշխատանքային հենասյունային խմբեր, որոնցից է սոցիալական ոլորտի առողջապահական խումբը, որտեղ քննարկումների ընթացքում հենց արցախցիների կողմից առաջարկվեց այս ծրագիրը, քանի որ այն նախադեպ ունի տարբեր երկրներում: Այն հավանության արժանացավ նաև ճակատի գործադիր կոմիտեի կողմից: Մտավախություն կար, որ հնարավոր է անհրաժեշտ ապրանքները չկարողանանք գտնել, բայց արագ սննդի ծառայություն մատուցող մասնավոր կազմակերպություններից մեկը պատրաստակամություն հայտնեց օժանդակել: Սոցիալական ցանցերում կարծիքներ են շրջանառվում, որ կարելի էր սնունդը բաշխել: Ո՛չ գործակալությունը, ո՛չ հանրային շարժումը սննդի պաշարներ չունեն. այդ ծառայությունը մատուցում է մասնավոր կազմակերպություն: Բացի այդ, սննդի բաշխում իրականացնելն այլ ծրագիր է, որով զբաղվում է Սոցիալական զարգացման և միգրացիայի նախարարությունը»,- «Արցախպրես»-ի հետ զրույցում մանրամասնել է «Մենք ենք մեր սարերը» տարածքային զարգացման գործակալության սոցիալական ծրագրերի համակարգող Արմեն Մանգասարյանը:
Նա նշել է, որ ճաշարանը գործում է «Park Hotel» հյուրանոցային համալիրի առաջին հարկում, որովհետև այն Սուրբ Աստվածամոր Հովանի մայր տաճարի հարակից տարածքում է. այդ մոտեցումը ևս տարբեր երկրներում կա: Ծրագրի իրականացման գործում ներգրավվել են նաեւ կամավորներ, ովքեր պատրաստի ուտելիքը հասցնելու են այն մարդկանց, որոնք ի վիճակի չեն լինի ճաշարան այցելել:
«Արցախի թեմը ևս ողջունել է այս ծրագիրը և իր հավանությունը տվել: Այս պահին Ստեփանակերտում կգործի այս կետը: Եթե մի քանի օրվա ընթացքում անհրաժեշտություն լինի նոր կետի բացման, միգուցե մայրաքաղաքում այլ կետեր էլ բացվեն: Հնարավոր է` նաև շրջկենտրոններում ունենանք նմանատիպ ճաշարաններ: Գյուղական համայնքներում խնդիրներն ավելի մեղմ են, դրա համար առաջին փուլում որոշեցինք ծրագիրը Ստեփանակերտում իրականացնել: Շահառուներ կարող են դառնալ մինչև 16 տարեկան անչափահաս երեխաներն ու նրանց ուղեկցողները, ինչպես նաև հղիներն ու 65-ից բարձր տարիք ունեցող քաղաքացիներ: Ծրագիրը մեկնարկում է ժամը 13:00-ին և տևում մինչև 16:00-ն: Քաղաքացիները տեղում պետք է ներկայանան և օգտվեն ճաշարանից»,-ընդհանրացրել է մեր զրուցակիցը:
