Սաթենիկ Գրիգորյանը մեկն է այն հազարավոր մայրերից, ովքեր Արցախի լիակատար շրջափակման հարուցած խնդիրների պատճառով մանկահասակ երեխայի խնամքի հարցում բախվում են ամենօրյա բազմաթիվ դժվարությունների։
Շրջափակման աղետալի պայմաններում երեխաների խնամքը կազմակերպելը գրեթե անհնար է դառնում. անդրադարձ
«Աստղիկս, փառք Աստծո, կերակրվում է մայրական կաթով, սակայն այն սննդամթերքը, որն անհրաժեշտ է երեխայի աճի ու զարգացման համար (մրգեր, ձուկ և այլն), չկա, ու վիտամինների պակասը մնում է չլրացված։ Նոր է լրացել դստերս մեկ տարին։ Ճիշտ է, մայրական կաթն անփոխարինելի է, սակայն անհրաժեշտ է նաև հավելյալ սնունդ։ Մեծ ցավ է մոր համար, երբ ստիպված է սոցցանցերում գրառում կատարելով կաթնախառնուրդ կամ այլ սնունդ ձեռք բերել բալիկի համար, և շատ հաճախ չենք էլ գտնում։ Երեխաս ունի ալլերգիկ ռեակցիաներ, ուստի տակդիրները զգուշությամբ եմ ընտրում։ Ճիշտ է, որոշ քանակությամբ ձեռք եմ բերել, բայց, շրջափակման շարունակականության դեպքում, դժվար հերիքի։
Մեր զրուցակիցն Աշանի համայնքապետարանի աշխատակից է։ Ասում է` հովհարային անջատումների պայմաններում աշխատանքը ևս իրենից մեծ դժվարություն է ներկայացնում։