Տարեսկզբից Հայաստանից դեպի Ռուսաստան արտահանվել է ավելի քան 20,5 մլն հատ ծաղիկ։
Հայաստանից ծաղիկների մատակարարումը Ռուսաստան կրկնապատկվել է. Ռոսսելխոզնադզոր
6 մարտի, ԱՐՑԱԽՊՐԵՍ։ Տեղեկությունը հայտնում է Ռոսսելխոզնադզորի մամուլի ծառայությունը։ 2023 թվականի նույն ժամանակահատվածում Հայաստանից ՌԴ էր արտահանվել ավելի քան 11 մլն հատ ծաղիկ, փոխանցում է infoport-ը։
Ամենից շատ արտահանվել են կակաչներ՝ 15,7 միլիոն հատ, քանակով հաջորդում են վարդերը՝ 4,3 միլիոն հատ։ Այս տարի ներկրվել է նաև 211 հազար հատ ալստրոմերիա, 88 հազար հատ հերբերա, 2 հազար հատ քրիզանթեմներ և 1500 հատ նարգիզ։
Նշենք, որ 2023 թվականի նույն ժամանակահատվածի համեմատ Հայաստանից Ռուսաստան էր արտահանվել գրեթե 5,5 մլն հատ կակաչ (գրեթե 3 անգամ պակաս 2024-ի համեմատ), 3,1 մլն հատ վարդեր (մոտ 1,3 անգամ պակաս) և այլն։
Ռոսսելխոզնադզորից նաև հայտնում են, որ միևնույն ժամանակահատվածում Թուրքիայից Ռուսաստան է արտահանվել 487,4 հազար մեխակ, Վրաստանից՝ 200 հազար միմոզայի ճյուղ։ Վերին Լարսի անցակետով այլ երկրներից ծաղիկներ չեն ներկրվել։
