Հունիսի 6-ին՝ մեծ կոմպոզիտոր Արամ Խաչատրյանի ծննդյան օրը, Երեւանում կմեկնարկի Արամ Խաչատրյանի անվան 11-րդ միջազգային մրցույթը` «ջութակ» մասնագիտությամբ։
Արամ Խաչատրյանի անվան միջազգային մրցույթն աշխարհում մեծ ճանաչում է վայելում
ՍՏԵՓԱՆԱԿԵՐՏ, ՀՈՒՆԻՍԻ 6, ԱՐՑԱԽՊՐԵՍ: Այս առթիվ մեծ կոմպոզիտորի տուն-թանգարանում տեղի ունեցած մամուլի ասուլիսում ՀՀ նախագահի խորհրդական, Արամ Խաչատրյանի անվան միջազգային մրցույթի հոգաբարձուների խորհրդի նախագահ Արմեն Սմբատյանն ընդգծեց, որ Արամ Խաչատրյանի անվան միջազգային մրցույթը 11 տարիների ընթացքում հասել է նրան, որ այն աշխարհում մեծ ճանաչում է վայելում, ինչի ապացույցը 17 երկրից ժամանած մասնակիցներն են։ Այս տարիների ընթացքում մրցույթը կարողացել է ներկայանալ օբյեկտիվորեն, եւ այսօր այն արժանի տեղ է գրավում այնպիսի մրցույթների կողքին, ինչպիսիք են Չայկովսկու, Եղիսաբեթ թագուհու անվան եւ այլ միջազգային մրցույթները։
Պարոն Սմբատյանի տեղեկացմամբ՝ ընդհանուր առմամբ մրցույթին դիմել էր մոտ 60 ջութակահար։ Ընտրվել են 25-ը, որոնցից 5-ը հայաստանցի երիտասարդ երաժիշտներ են։
11-րդ միջազգային մրցույթի ժյուրիի նախագահ Էդուարդ Թադեւոսյանը շեշտեց, որ խաչատրյանական մրցույթը Միջազգային երաժշտական մրցույթների համաշխարհային ֆեդերացիայի անդամ է, ինչն ավելի պարտավորեցնող է։ Նա ցանկացավ, որ Արամ Խաչատրյանի գունեղ, բազմերանգ, շռայլ տաղանդը ոգեւորի մրցույթի երիտասարդ մասնակիցներին։
ՀՀ մշակույթի փոխնախարար Արթուր Պողոսյանը շեշտեց, որ հեշտ բան չէ լինել Միջազգային երաժշտական մրցույթների համաշխարհային ֆեդերացիայի անդամ։ Սա նշանակում է, որ այն աշխարհում միջազգայնորեն ճանաչված է, համապատասխանում է միջազգային չափանիշներին։ Մշակույթի փոխնախարարը ձեռքբերում անվանեց այն, որ մրցույթում 2016-ից ավելանալու է դիրիժորություն մասնագիտությունը։ Բացի այդ, Միջազգային երաժշտական մրցույթների համաշխարհային ֆեդերացիայի 2016 թվականի գլխավոր վեհաժողովը տեղի կունենա Հայաստանում։
Մրցույթի գլխավոր հովանավոր «Յուքոմ» ընկերության մարքեթինգի դեպարտամենտի ղեկավար Աշոտ Բարսեղյանը նշեց, որ իրենց համար մեծ պատիվ է աջակցել նման բարձրակարգ մրցույթին։ Նա ընդգծեց, որ «Յուքոմը» ձգտում է լինել այն կազմակերպությունների կողքին, որոնք հանդես են գալիս հայկական մշակույթը զարգացնելուն ուղղված ծրագրերով։